Alaıaqtyqqa jáne qarjy pıramıdalaryna qarsy keshendi is-sharalar ázirlenedi
Mınıstrdiń aıtýynsha, Prezıdent Joldaýyn iske asyrý jalpyulttyq josparynyń tórtinshi baǵytynda 6 is-sharany iske asyrý kózdelgen. Naqty aıtanda, «Kásibı biliktilikter týraly» Zań jáne jumyspen qamtýdyń jańa úlgilerin retteý tetikteri ázirlenetin bolady. Kóshi-qon saıasatynyń jańa tujyrymdamasy ázirlenedi. Elmizdiń ońtústiginen soltústigine kóship jatqan azamattarǵa járdemaqy bólýdiń qoldanystaǵy tásilderin qaıta qaraý kózdeledi.
«Altynshy baǵytta 13 is-sharany iske asyrý kózdelgen. Aýyldyq jerlerdegi azamattyq bastamalardy qoldaýdyń tıimdi tásilderi ázirlenedi. Depýtat mandatyn bólý kezinde kvotany mindetti túrde eskerý boıynsha talap zań júzinde bekitiletin bolady. Sonymen qatar, kvota bólinetin azamattar sanatynyń tizimin keńeıtý josparlanýda. Sybaılas jemqorlyqpen tıimdi kúresti jalǵastyrý maqsatynda orta merzimdi kezeńge arnalǵan tıisti strategııalyq qujat bekitiledi. Otbasylyq jáne genderlik saıasat tujyrymdamasyna ózgerister engiziledi. Alaıaqtyqqa jáne qarjy pıramıdalaryna qarsy keshendi is-sharalar ázirleý josparlanýda», - dedi Áset Erǵalıev.
Onyń atap ótýinshe, jetinshi baǵytta 5 is-shara iske asyrylady.
«Jańa mádenıettiń daryndy ókilderin dáripteýge baǵyttalǵan naqty is-sharalardy ázirleý josparlanýda. Kreatıvti ındýstrııany qoldaý qoryn qurý múmkindigi qarastyrylatyn bolady. «Ulttyq Rýhanı Jańǵyrý» ulttyq jobasy aıasynda otanshyldyq, bilimge qushtarlyq jáne eńbekqorlyq sııaqty qasıetterdi dáripteý boıynsha sharalar ázirleý kózdelip otyr», - dedi ol.