Alaıaqtyq úshin Aqmola oblysynda polıtseı men onyń sybaılasy sottaldy

KÓKShETAÝ. QazAqparat – Aqmola oblysynda burynǵy patrýldik polıtsııa ınspektory men onyń sybaılasy alaıaqtyq úshin sottaldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Sot anyqtaǵandaı, sottalýshylar úsh adamnyń senimine kirip, júrgizýshi kýáligine emtıhan tapsyrý kezinde kómektesýge ýáde etken. Sol úshin aqsha alǵan, keıin olardy mamandandyrylǵan Halyqqa qyzmet kórsetý ortalyǵyna jibergen. Alaıda, úsh adamnyń bireýi emtıhandy óz kúshimen tapsyrsa, qalǵan ekeýi óte almaı qalǵan.

«Alaıaqtyqtyń úsh epızody boıynsha jiberlenýshilerge 165 000, 250 000 jáne 350 000 teńge kóleminde zııan keltirildi. Sottalýshylar úsh adamǵa jasaǵan alaıaqtyq qylmysyn moıyndady. Olardyń kinási jábirlenýshiler men kýágerlerdiń aıǵaqtary, sot-vıdeofonografııa saraptamalarynyń qorytyndysymen dáleldendi. Sonymen birge «Kaspi Bank» shotynan aqsha aýdarylǵandyǵy týraly túbirtek kóshirmeleri, jábirlenýshilermen jazǵan hat-habarlary alyndy», - dedi sottyń baspasóz qyzmetinen.

Jaza taǵaıyndaý kezinde sottalýshylardyń qylmystyq jaýaptylyǵy men jazasyn jeńildetetin mán-jaılar – shyn júrekten ókinýi, kináni moıyndaýy, keltirilgen zalaldyń ornyn toltyrýy eskerildi.

«Sot úkimimen burynǵy polıtsııa ınspektory Qylmystyq kodekstiń 190-babynyń 3-bóligi 2 jáne 4-tarmaqtary boıynsha kináli dep tanylyp, 3 jylǵa bas bostandyǵynan aıyrý jazasyna kesildi. Sonymen birge ol ómir boıyna memlekettik qyzmet atqarý quqyǵynan, polıtsııanyń aǵa leıtenanty ataǵynan aıyryldy.

Al onyń sybaılasy Qylmystyq kodekstiń 190-babynyń 5-bóligi 2 jáne 1-tarmaqtary, 28-baptyń 4-bóligi boıynsha 4 jylǵa bas 6ostandyǵy shektelip, probatsııalyq baqylaý belgilendi», - dep tolyqtyrdy vedomstvodan.

Sot úkimi zańdy kúshine engen joq.