Alaıaqtyq arqyly azamattardyń derbes derekterin urlaý faktileri jıilep ketti - ІІM

NUR-SULTAN. QazAqparat - Elimizdiń Іshki ister mınıstrligi sońǵy ýaqytta jeke tulǵalardyń derbes derekterin alaıaqtyq jolmen ıelený áreketiniń jıilegenine alańdaýly, dep habarlaıdy QazAqparat tilshisi.

«Qazaqstanda jasalatyn qylmystyń 10 paıyzdan astamy - alaıaqtyq. Tehnologııanyń damýyna baılanysty azamattardy aldaýdyń ádisteri kún sanap ósýde. Sońǵy ýaqytta ınternet resýrstarda jarııalanǵan habarlandyrýlardy paıdalana otyryp, azamattardyń derbes derekterin ıelený jaǵdaılary jıilep ketti», - dedi QR Іshki ister mınıstrliginiń resmı ókili Nurdildá Oraz onlaın ótken baspasóz máslıhatynda.

Sondaı-aq, mınıstrliktiń resmı ókili alaıaqtar óz áreketin qalaı júzege asyratynyn aıtty.

«Alaıaqtar azamattar jarııalaǵan habarlandyrýlarǵa qońyraý shalyp nemese habarlama joldap, taýardy satyp alǵysy keletinin jáne satýshynyń bank kartasyna kepilzat alýdy usynady. Bank aýdarymyn rastaý úshin alaıaqtar satýshyǵa «fıshıng» siltemesin jiberip, ony toltyrýdy suraıdy. Silteme is júzinde azamattardyń kartochka shoty týraly aqparat jınaýǵa arnalǵan. Osy derekterdi alǵannan keıin alaıaqtar jábirlenýshilerdiń bank shotynan aqsha urlaıdy», - deıdi ol.

ІІM taratqan aqparatqa sáıkes, 11 aıda ınternet alaıaqtyqqa qatysty 12 myńǵa jýyq is tirkelgen.

«Onyń 5 myńǵa jýyǵy alaıaqtardyń ınternet-saýda alańdary men saıtta jarııalanǵan habarlandyrýy boıynsha joq taýarlar nemese qyzmetter úshin tolyq nemese ishinara tólem jasaý faktileri boıynsha qozǵaldy. 2,7 myńǵa jýyq alaıaqtyq onlaın kredıt rásimdeı otyryp, azamattardyń derbes derekterin ıelenýge baılanysty boldy. 1,5 myńnan astam alaıaqtyq azamattardyń jeke derekteri men kartochkalyq shotynyń derektemelerin ıemdenip, mobıldi bankıng arqyly aqsha urlaý arqyly jasalǵan», - deıdi ІІM resmı ókili.