Alaıaqtarmen tıimdi kúresý úshin ınternet-jarnamany zańdastyrý qajet – mınıstrlik

ASTANA. QazAqparat – 2022 jyldyń basynan alaıaqtyqpen baılanysty 17,5 myń qylmys tirkeldi. Aldaýdyń eń kóp taraǵan tásili - onlaın-saýda. Bul týraly «Ashyq» NQA portalynda jarııalanǵan «Internet-jarnama jáne onlaın-platformalar týraly» Zań jobasyna qosymsha konsýltatıvtik qujatynda jazylǵan, dep habarlaıdy QazAqparat tilshisi.

«2022 jyldyń basynan bastap alaıaqtyqpen baılanysty 17,5 myń qylmys tirkeldi. Al aldaýdyń eń kóp taraǵan tásili áli de onlaın-saýda bolyp otyr. Sondyqtan ınternet-jarnamany zańdastyrý onlaın keńistiktegi alaıaqtyq máselesimen tyǵyz baılanysty. Bul sharalar biriktirilip, alaıaqtarmen kúresti tıimdirek etedi jáne sonymen birge jarnama naryǵynyń ashyqtyǵyn arttyrady», - delingen konsýltatıvtik qujatta.

Aqparat jáne qoǵamdyq damý mınıstrliginiń «Taldaý jáne aqparat ortalyǵy» júrgizgen monıtorıng nátıjesinde byltyr onlaın-platformalardan myna quqyq buzýshylyqtar anyqtaldy:

- azamattardyń derbes derekterin zańsyz taratý – 100 fakti;

- sýıtsıdti nasıhattaıtyn aqparatty taratý – 88 fakti;

- basqa adamnyń ar-namysy men qadir-qasıetin qorlaıtyn aqparatty taratý – 147 fakti;

– kámeletke tolmaǵannyń jeke basyn anyqtaýǵa múmkindik beretin derbes nemese bıometrııalyq derekterdi, ózge de aqparatty taratý – 21 fakti.