Alaıaqtarmen qalaı sóılesý kerek: Mınıstr Mýsınniń jaýaby

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligi baılanys operatorlarymen birge telefon alaıaqtarynan túsken qońyraýlardy avtomatty túrde buǵattaýdyń jolyn qarastyryp jatyr. Bul týraly vedomstvo basshysy Baǵdat Mýsın Úkimet kýlýarynda BAQ ókilderiniń saýalyna bergen jaýabynda aıtty, dep habarlaıdy QazAqparat tilshisi.

«Alaıaqtar ádette shetelden qońyraý shalady. Biraq qazaqstandyqtarǵa otandyq nómirler kórinedi. Ádeıi aýystyryp jiberedi. Sondyqtan júıeler sheteldik qońyraýlardy oqyp, olardy buǵattaıtyn bolady. Telekom-operatorlarmen birlesip, aýystyrylǵan nómirlerdi buǵattaý úshin jumys júrgizip jatyrmyz», - dedi mınıstr.

Aıtýynsha, uıaly baılanys qyzmetin usynatyn eki operator osyndaı tehnologııany testileýden ótkizip kórgen. Barlyq qajetti jumystar júrgizilgennen keıin júıe biriktirilip, iske qosylmaq.

«Sonymen birge statsıonarlyq telefondar arqyly da alaıaqtardyń jolyn kesý úshin «Qazaqtelekommen» birge jumys bastaý josparlanyp otyr», - dedi vedomstvo basshysy.

Sondaı-aq mınıstr alaıaqtar ózine de habarlasqanyn aıtty.

«Iá, maǵan da qońyraý shalǵan. Ondaı qońyraýlarǵa beretin jaýabym qarapaıym. Qońyraý túsken boıda qazaqsha jaýap beremin, olar tutqany qoıa salady», - dedi Baǵdat Mýsın.