Alaıaqtarǵa aldanǵandardyń shyǵynyn óteý bankterge mindettelmek

ASTANA. QazAqparat – Nesıe alýda alaıaqtarǵa aldanǵan qazaqstandyqtarǵa shyǵyndy óteý máselesi pysyqtalyp jatyr. Bul týraly QR Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy QazAqparat tilshisi.

«Bul turǵyda alaıaqtyq jolmen turǵyndarǵa nesıe rásimdelýi múmkin nemese adamdardyń jeke qarajaty jymqyrylýy yqtımal. Eger sot sheshimi bolmasa, onda qarjy ınstıtýty jaǵynan mundaı ótemaqy júzege asyrylmaıdy. Ekinshiden, eger aqparattyq qaýipsizdik nemese banktiń aqparattyq júıeleri kemshiligi saldarynan salymshynyń aqshasy jymqyrylsa, ıaǵnı bul salymshynyń kinási bolmasa, onda biz zańnamalyq deńgeıde banktiń ótemaqy tóleýi jónindegi mindettemesin qarastyrǵymyz keledi», - dedi M. Ábilqasymova Májiliste tilshiler suraǵyna jaýap bere otyryp.

Onyń aıtýynsha, qazirgi kezde bul protsedýranyń mehanızmi men algorıtmi ázirlenip jatyr. Onda alaıaqtyq operatsııalardyń barlyq tıpologııasy, aqparattyq qaýipsizdik pen smartfondarǵa arnalǵan qosymshalarǵa qatysty talaptar eskerilmek.

«Eger bul talaptar buzylsa, qarjy uıymdary úshin tıisti jaýapkershilik qarastyrylady», - dep qosty Mádına Ábilqasymova.

Tıisti zań jobasyn Májiliske 2023 jyldyń maýsym aıynyń sońyna deıin engizilmek.

Budan buryn habarlanǵandaı, Qazaqstanda jańa bankterdi ashý talaptary jeńildetilýi múmkin.

QR Qarjy naryǵyn retteý jáne damytý agenttiginiń tóraǵasy Bereke Bank-ti qaı eldiń ınvestorlary satyp alýy múmkin ekenin aıtty.