Alaıaqtarǵa aldanǵan aqtóbelikterden 400-ge jýyq aryz tústi

AQTÓBE. QazAqparat – Aqtóbelikter onlaın saýda jasap, aldanyp qalyp jatyr. Jyl basynan beri 365 is tirkeldi, dep habarlaıdy QazAqparat tilshisi.

Aqtóbe oblysynda alaıaqqa aldanǵandar kóbeıdi. Belgisiz bireý «OLX» saıtyna taýardy tómen baǵamen satý týraly habarlandyrý beredi. Aqshany mobıldi qosymsha arqyly kúni buryn tóleýdi suraıdy. Shotqa aqsha túskennen keıin, uıaly telefondaryn sóndirip, habarsyz ketedi.

«Taǵy bir túri bar. Aılakerler «OLX» saıty arqyly taýardy satyp almaq bolyp, jábirlenýshiniń bank kartasynyń nómirlerin bilip alady. Keıin esepshottaǵy bar qarajatty ıemdenedi. Sonymen birge «OLX» nemese «Qazposhta» AQ arqyly jetkizýdi resimdeý syltaýymen alǵan qujatty toltyrýǵa silteme jiberedi. Onda sizdiń bank kartańyzdyń derekterin talap etedi. Bıyl osy jolmen aldanǵandardan 365 aryz tústi. Taýar baǵasy tómen bolsa, aldyn ala tólem surasa, bul qaýipti. Aqshany keri qaıtarý múmkin emes», - dedi oblys PD bastyǵy Atyǵaı Arystanov.