Alaıaqtardyń qurbany bolǵan 250 oralman qujattaryn qaıta ázirleýde

TARAZ. QazAqparat - Tarazda zańsyz kóshi-qon uıymdastyrýǵa qatysy bar bes alaıaqqa qatysty atyshýly qylmystyq is aıaqtaldy. Jambyl oblysynyń aýmaǵynda zańdy qujattarynsyz júrgen 250 oralman zardap shegýshi bolyp tanyldy, dep habarlaıdy «QazAqparat» HAA tilshisi.

Aıta keteıik, 2015 jyly Qytaıdan 250 etnıkalyq qazaq kóship kelgen. Eki jyldan keıin  olardyń Qazaqstanda jalǵan qujatpen ómir súrip jatqany anyqtaldy. Zań boıynsha olar elden shyǵarylýy kerek bolǵan. Elden alastatý máseleleri de qarastyrylyp jatqan bolatyn. Alaıda, olar BAQ jáne áleýmettik jeliler arqyly qujattaryn talapqa saı sáıkestendirýdi jáne Qazaqstanda qalýlaryna kómek kórsetýdi surap, QR Premer-Mınıstri Baqytjan Saǵyntaevqa júgingen bolatyn.

Jýyrda Taraz qalasynyń №2 soty Taraz Іshki ister basqarmasynyń kóshi-qon polıtsııasy bólimshesiniń bastyǵy men ınspektory Asqan Zeıdalıev pen Rýslan Qasymovty, sondaı-aq aımaq turǵyndary Rýslan Úserovti, Barsha Óser jáne Láılá Bısenbaevany QR QK-iniń birqatar baptary boıynsha kináli dep tapty. 

Olarǵa Qytaı, Qyrǵyzstan, Ózbekstan jáne Reseıden kelgen 609 shetel azamatyna qatysty zańsyz kóshi-qon uıymdastyrdy degen aıyp taǵyldy. Aıyptalýshylar shetel azamattaryna eńbekke aralasýǵa, ýaqytsha tirkeýge turýǵa, mekenjaı boıynsha tirkelýge jáne yqtııar hat alýǵa zańsyz ruqsat berip kelgen.

Jambyl oblysy ІІD málimetinshe, Qytaıdan kelgen 250 oralman alaıaqtyq pen deldaldardyń qurbany boldy. Qazir olardyń barlyǵy yqtııar hat alýǵa qaıtadan qajetti ınstantsııalardan ótip jatyr. 50-ge jýyǵy resmı tirkeýge turyp, úsheýi Qazaqstan Respýblıkasynyń azamattyǵyn alyp úlgerdi.