Alaıaqtardyń arbaýyna túsken aqmolalyq áıel 5 mln teńgege aldandy
Oblystyq polıtsııa departamenti baspasóz qyzmetiniń málimetinshe, tamyzdyń 4-inde Tselınograd aýdandyq polıtsııa bólimine 36 jastaǵy jergilikti turǵynnan ótinish túsken.
«Belgili bolǵandaı, ol ınternet alaıaqtary qoldanatyn eń kóp taralǵan shemaǵa tap bolǵan. 1 tamyzda áldekim zardap shegýshiniń telefonyna qońyraý shalyp, ózin 2-deńgeıli bankterdiń biriniń qaýipsizdik qyzmetiniń qyzmetkeri dep tanystyrǵan jáne qazirgi ýaqytta onyń atynan nesıe alýǵa ótinish túskenin habarlaǵan. Úreıi ushqan áıel alaıaqpen sóılesip turǵanyn túsinbegen, al ol bolsa, uıaly telefonyna qosymshany júkteý arqyly zańsyz áreketterdi toqtatýǵa bolatyndyǵyna sendirgen», - dedi vedomstvodan.
Polıtsııa departamentiniń baspasóz qyzmetinen atap ótkendeı, alaıaqtardyń nusqaýlaryn oryndaı otyryp, aýyl turǵyny qajetti qosymshalardy ornatyp, keıin eki bankten jalpy somasy 5 200 000 teńgeden astam nesıe rásimdegen. Aqsha birden alaıaqtardyń shotyna aýdarylǵan. Tek 3 kúnnen keıin áıel aldaýdyń qurbany bolǵanyn túsinip, polıtsııaǵa júgingen.
«Qazirgi kezde, osyǵan baılanysty Qylmystyq kodekstiń 190-baby 3-bóligi «alaıaqtyq» boıynsha sotqa deıingi tergeý amaldary júrgizilip jatyr», - dedi vedomstvodan.
Aıta ketsek, elimizde ınternet pen telefon arqyly alaıaqtyq jasaý faktileri kóbeıip barady. 2016 jyly 1 myń derek tirkelgen bolsa, 2021 jyly 21 myńǵa jetken. Osy oraıda, tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın qyrkúıek aıynyń sońyna deıin baılanys operatorlary alaıaqtar qońyraý shalatyn jalǵan telefon nómirlerin anyqtap, buǵattaıtyndyǵyn málim etti.