Alaıaqtar UQK atynan adamdarǵa qońyraý shalyp, qujat jiberip jatyr

<p>ASTANA. KAZINFORM &mdash; Qazirgi ýaqytta alaıaqtyq áreket faktileri jıilep ketti. Endi shabýyldaýshylar kúshtik qurylymdardyń, sonyń ishinde Ulttyq qaýipsizdik komıteti basshylarynyń atynan azamattarǵa qońyraý shalyp jatyr. Bul týraly vedomstvonyń baspasóz qyzmeti habarlady.</p>

Alaıaqtar atap aıtqanda, qońyraý shalyp nemese ózderiniń múddesi úshin qarjylyq jáne basqa operatsııalardy júrgizý týraly ótinishteri nemese talaptary bar mátindik habarlamalar jiberedi. Bul rette azamattarǵa olardyń atyna qylmystyq maqsatta paıdalanylǵan aqshalaı nesıe resimdelgeni, sondaı-aq qylmystyq jaýaptylyqqa tartylatyny jaıly qorqytqan habarlama keledi.

UQK sımvolıkasy bar arnaıy daıyndalǵan qujattardyń faıldary jıi jiberiledi (qyzmettik kýálik, hattar men buıryqtardyń fırmalyq blankileri).

Esterińizge sala keteıik, UQK qyzmetkerleri qyzmettik mindetterin atqarý kezinde azamattarǵa qandaı da bir qarjylyq operatsııalar júrgizýdi usynýǵa ókilettigi joq.

Eger siz nemese tanysyńyz osyndaı jaǵdaıda tap bolsa, tez arada áńgimeni/hat jazysýdy toqtatýy jáne 102 telefony boıynsha polıtsııaǵa júginýi tıis.