Alaıaqtar «Prezıdent Ákimshiliginen» qońyraý shalyp, zardap shegýshilerge maskı-shoý uıymdastyrǵan

ASTANA. QazAqparat – Alaıaqtar toby Memleket basshysy jastardyń jańa komandasyn jınap jatqanyn aıtyp, Prezıdent Ákimshiliginen zardap shegýshilerge qońyraý shalǵan. Astanadaǵy qymbat otelderde kezdesýler uıymdastyryp, oǵan jalǵa alynǵan lıýks mashınalarmen, jaldanǵan oqqaǵarlarmen baryp otyrǵan. 5 adamǵa sot úkimi shyqty. Alaıda olar jazamen kelispeı, apellıatsııaǵa bergen. QazAqparat bul týraly Astana qalalyq sotyna silteme jasap habarlaıdy.

Astana qalasynyń apellıatsııalyq soty 2022 jyldyń 21 qarashasynda Saryarqa aýdanynyń №2 soty shyǵarǵan úkimdi ózgerissiz qaldyrdy.

Atalǵan úkimmen eki epızod boıynsha (alaıaqtyq jáne asa iri kólemde alaıaqtyq jasaýǵa oqtalý) 5 adam jaýapqa tartylǵan bolatyn. Birinshi epızodta soma kólemi – 250 myń dollar, ekinshisi boıynsha – 500 myń dollar.

Anyqtalǵandaı, Aqtóbe qalasynda júrgen azamat K. zardap shegýshilerge qońyraý shalyp, ózin Qazaqstan Prezıdenti Ákimshiliginiń laýazymdy sheneýnigi retinde tanystyrǵan. Ol Memleket basshysy Qańtar oqıǵasynan keıin kelesheginen zor úmit kúttiretin jas basshylar komandasyn jınap jatqanyn aıtqan.

Keıin Astanadaǵy qymbat qonaqúılerde zardap shegýshilerdiń kezdesýin uıymdastyryp, olardy joǵary laýazymdy qyzmetter – Aqtóbe qalasynyń ákimi jáne Aqtóbe oblysy ákiminiń orynbasary etip taǵaıyndaý máselesin talqylaǵan.

K. men S. atynan joǵary laýazymdy sheneýnikter rólin T. jáne B. oınaǵan.

T. men B. Astananyń qymbat qonaqúılerindegi kezdesýge jalǵa alynǵan lıýks sanattaǵy kóliktermen, jaldanǵan oqqaǵarlarmen baryp otyrǵan. Qylmystyń taǵy bir qatysýshysy – B., ózin olardyń júrgizýshisi retinde tanystyryp, birinshi epızod boıynsha 250 myń dollar aqsha alǵan.

Kelesi bir qatysýshy – M. páterdi birneshe táýlikke jalǵa alý, ózge qalalardan ushaqpen kelip-ketý, lıýks sanattaǵy kólikterdi jalǵa alý, eki oqqaraǵardy jaldaý máselerin uıymdastyrǵan.

2022 jyldyń 4 naýryzynda 300 myń teńge jáne 28 mln teńge kólemindegi aqshanyń mýlıajyn zardap shegýshiden alý barysynda azamat B.-ny polıtsııa qyzmetkerleri ustady.

«Árqaısysynyń róli jáne olardyń kámeletke tolmaǵan balalarynyń bary eskerile otyryp, sot 5-ten 7 jylǵa deıin ártúrli jaza taǵaıyndady. Al deldaldyń qylmystyń ashylýyna besendi atsalysqany eskerilip, oǵan 5 jylǵa shartty merzim belgilendi», - delingen sot habarlamasynda.

Sottalǵandardyń úkimdi qaıta qaraý týraly apellıatsııalyq shaǵymyn sot qanaǵattandyrýsyz qaldyrdy.