Alaıaqtar paıyzsyz kredıt usyný arqyly aldaýǵa kóshken

ASTANA. QazAqparat – Kredıt usynatyn alaıaqtar Telegram-da keńinen taralyp ketti. Bul jaıynda jazǵan Fingramota.kz medıaportaly olardyń alaıaqtyqtyń shemasy men qorǵaný qaǵıdalaryn da túsindirgen. Sondaı-aq, Qazaqstanda kredıtterdi Qarjy naryǵyn retteý jáne damytý agenttiginiń lıtsenzııasy bar kredıttik uıymdardyń ǵana bere alatynyn eske salady, dep habarlaıdy QazAqparat.

Telegram-daǵy alaıaqtyqtyń shemasy

Telegram arnasyndaǵy jalǵan kompanııalardyń biri qoldanatyn aldaý shemasyna mysal keltireıik. Ol jeke ınvestorlar beretin «paıyzsyz» kredıtter týraly jarnamany ornalastyrady, sondaı-aq 10 mln teńgege deıingi qaryzdyń 10 jyl merzimge beriletinin atap kórsetedi. Bul rette, olardyń aqparatyna sáıkes, tipti ol adamnyń resmı jumysy bolmaıtyn jaǵdaıdyń ózinde kredıt 18 jastan asqan barlyq adamǵa beriledi. Tipti, alaıaqtar olardyń kompanııasynyń qyzmetterin paıdalanýdyń qaýipsiz ekendigine de kepildik beredi.

Paıdalanýshy arnaǵa qosylǵan ýaqytta alaıaqtar ózderiniń bazasyna onyń profıliniń derekterin avtomatty túrde engizedi jáne óziniń bolashaq qurbanymen endi Telegram arqyly ne WhatsApp jelisiniń kómegimen hat-habar almasýdy jalǵastyrady, munda joıylyp ketetin habarlar rejımi bolady. Sondaı-aq, jalǵan nómirler men memlekettik tirkeý týraly jalǵan kýálikter qoldanylady.

Adamdy «barlyq jaǵynan tıimdi» kredıt alýǵa kóndirgennen keıin, qaskúnemder oǵan ótinimdi toltyrý qajet saıtqa silteme jiberedi, sondaı-aq «rıza bolǵan klıentter» men «naqty adamdardyń» pikirlerin-mys olardyń telegramm-arnasynda qaraýdy usynady. Neǵurlym senimdirek bolý úshin alaıaqtar ózderiniń Telegram paraqshasynda qaryz alýshynyń jeke kýáligin kórsete otyryp, qaryzdy resimdeý protsesine beınejazba ornalastyrady.

Sodan keıin alaıaqtar qurbanyna ótinim maquldanǵanyn jáne kólemi 30 000 teńgeden bastalatyn kredıtti resimdeý úshin komıssııa tóleý qajet ekenin habarlaıdy. Kredıtti rásimdeý rásimin aıaqtaý úshin qaryz alýshy qosymsha tirkeýden ótip, taǵy birneshe qyzmet úshin aqy tóleýi kerek: aqshany avtomatty túrde aýdarý, shotty iske qosý, bank uıashyǵyn jalǵa alý.

Sonymen qatar, alaıaqtar olardy anyqtaý múmkindigi bolmaýy úshin úshinshi tulǵanyń kartasyna aýdarýdy suraıdy. Qurban bolǵan adam barlyq tólemderdi jasaǵannan keıin, qaskúnemder «aqsha aýdarýǵa» ýaqyt suraıdy. Biraq, aldanǵan qaryz alýshymen bolashaqta ózara árekettesý tolyǵymen toqtatylady.

Mańyzdy! Eger siz osyndaı alaıaqtyq shemalardyń qatysýshysy bolsańyz jáne qaskúnemderdiń áreketinen zardap shekken bolsańyz, onda siz dereý turǵylyqty jerińizdegi polıtsııa bólimshesine jáne bankke óz shottaryńyz ben kartochkalaryńyzdy buǵattaý úshin habarlasýyńyz kerek!

Kredıttik alaıaqtardan qorǵaný qaǵıdalary

Esińizde bolsyn! Bankter men mıkroqarjy uıymdary úshinshi tulǵalar men deldaldardan banktik qaryzdar/mıkrokredıtter berýge ótinimder qabyldamaıdy. Kredıtke ótinimdi tek qaryz alýshynyń ózi beredi!

WhatsApp, Telegram, Viber jáne basqa da messendjerler arqyly bógde adamdarǵa ózińiz jáne kartańyz týraly aqparatty, parolderdi, logınderdi, kodtar men basqa da jeke derekterińizdi bermeńiz.

Fıshıngtik siltemelerge kirmeńiz jáne sizdiń qurylǵyńyzǵa qashyqtan kirýge múmkindik beretin qosymshalardy (AnyDesk, TeamViewer) jazyp almańyz.

Qarjy naryǵynda qyzmetti júzege asyrýǵa ruqsat beretin qujattary joq tulǵalardan qaryz qarajatyn alýǵa tyryspańyz. Kredıt berýshiniń tirkeý derekterin, ruqsat beretin qujattarynyń bolýyn tekserińiz.

Mańyzdy! Kredıtordyń qazaqstandyq qarjy naryǵynda zańdy túrde jumys isteıtinin nemese jumys istemeıtinin retteýshiniń www.gov.kz ınternet-resýrsynda «Qarjy naryqtary» bóliminde tekserýge ne «Fingramota Online» mobıldi qosymshasy nemese «1459» nómiri boıynsha Call-ortalyqqa qońyraý shalý arqyly Agenttikke júginýge bolady.