Alaıaqtar bankterden 18 mlrd teńgege nesıe rásimdegen

<p>ALMATY. KAZINFORM &ndash; Kredıt berý naryǵynda ózekti máselelerdiń biri &ndash; qarjy alaıaqtyǵynyń ósýi. Bul týraly Qarjy naryǵyn retteý jáne damytý agenttiginiń tóraǵasy Madına Ábilqasymova aıtty.</p>

«Qazir nesıe berý naryǵynda ózekti máselelerdiń biri – qarjy alaıaqtyǵynyń ósýi. Jyl basynan beri 18 mlrd teńgege 7,4 myń jalǵan kredıt berilgen. Osyǵan baılanysty Qarjy naryǵyn retteý jáne damytý agenttigi, Ulttyq bank jáne Іshki ister mınıstrligi birlesip, alaıaqtyqty anyqtaý, jolyn kesý sharalaryn jasady», - deıdi agenttik tóraǵasy.

Aıtýynsha, halyqtyń shamadan tys kredıt alýyn azaıtý úshin maýsym aıynda qaryz alýshylardyń quqyqtaryn qorǵaý jónindegi zań qabyldandy.

Zańnyń negizgi jańalyqtary 90 kúnnen astam tólem merzimi ótken kezde, kredıt berýge tyıym salynady. Budan basqa 45 kúnge deıinge merzimge 50 AEK-ge deıingi somada berilgen mıkrokredıtterdi retteýdiń erekshe tártibiniń kúshi joıylady.

«Negizgi sharalardyń ishinde árbir onlaın qaryzdar bergen kezde klıentterdi mindetti bıometrııalyq jáne kópfaktorly ındentıfıkattaýdy engizýdi, bankterdiń aqparattyq qaýipsizdigine jáne olardyń mobıldi qosymshalaryna qoıylatyn talaptardy qatańdatýdy atap ótýge bolady», - dedi Madına Ábilqasymova.

Sonymen qatar ol elektrondy úkimet portaly arqyly onlaın kredıt alýdan erikti túrde bas tartý múmkindigi qarastyrylǵanyn eske saldy.

Bas tartylsa da, alaıaqtar kredıt rásimdegen jaǵdaıda, bankter men mıkroqarjy uıymdary bul kredıtti syzyp tastaýǵa mindettelip otyr.