Alaıaqtar aýyspaly nómir arqyly eldiń esin aýystyrady – ІІM ókili
ІІM departament bastyǵy Shyńǵys Álekeshevtiń aıtýynsha, bank qyzmetkerleri nemese brokerlerdiń atynan aýyspaly nómirler arqyly jasalatyn alaıaqtyq keń taralǵan.
«Bizdiń bastamamyz boıynsha Tsıfrlyq damý mınıstrligi uıaly baılanys operatorlarymen birlesip, aýyspaly nómirlerden túsetin qońyraýlardy buǵattaý sharalary qabyldandy. Bul joba iske qosylǵan sətten bastap 45 mln qońyraýǵa tosqaýyl qoıyldy. Sonymen qatar, sheteldik nómirlerden jəne WhatsApp, Telegram sııaqty messendjerler arqyly jasalatyn alaıaqtyqtar da tirkelip jatady. Bıyl úsh aıda bankter men quqyq qorǵaý organdarynyń qyzmetkerleri atyn jamylyp jasalǵan 1278 qylmys tirkeldi», - deıdi ol.
Budan bólek, ərtúrli jobalarǵa, bırjalarǵa tıimdi ınvestıtsııa salý syltaýymen jasalatyn alaıaqtyq faktileri jıi kezdesedi.
Jalpy, bul saladaǵy qylmystarǵa qarsy is-qımyl tıimdiligin arttyrý maqsatynda byltyr «Kıberqylmysqa, onyń ishinde 2023-2025 jyldarǵa arnalǵan telefon jəne ınternet-alaıaqtyqqa qarsy is-qımyl baǵdarlamasy» iske asyrylyp jatyr.
«Baǵdarlama sheńberinde uıymdastyrýshylyq-praktıkalyq is-sharalar ótkizilip, múddeli memlekettik organdarmen jəne jeke sektormen ózara is-qımyl jolǵa qoıyldy. Birinshi kezekte halyqpen keń aýqymdy túsindirý jumystary júrgizilýde. Jyl basynan beri 6 myńǵa jýyq profılaktıkalyq materıaldar taratylyp, qoǵamdyq jerlerde bir mıllıonnan astam eskertý materıaldary ornalastyryldy. Sondaı-aq, bıyl biz «Qazaqtelekom» AQ-men birlesip, sheteldik qylmyskerler jasaıtyn telefon alaıaqtyqtaryna qarsy is-qımyldyń jańa tehnıkalyq ədisin engizdik», - deıdi Shyńǵys Álekeshev.
Endi IP jəne SIP telefonııany paıdalanatyn, elden tys jerde ornalasqan alaıaqtar QR azamattarynyń qalalyq abonenttik nómirlerine qońyraý shalyp, ózderiniń qylmystyq maqsattaryn júzege asyra almaıdy. Arnaıy júıe olardyń qońyraýlaryn tanyp, birden buǵattaıdy. Jyl basynan beri 2 mıllıonnan astam osyndaı qońyraý buǵattaldy. Bul telefon alaıaqtyǵyn azaıtyp qana qoımaı, ony tolyǵymen toqtatýǵa múmkindik berdi.