Alaıaq 49 mln teńgege qaryzǵa altyn alyp, lombardqa ótkizip jibergen

JETІSAI. QazAqparat – Túrkistan oblysy Jetisaı aýdandyq polıtsııa bólimine aryzdanǵan jergilikti turǵyn alaıaqtyń qurbany bolǵanyn jetkizgen, dep habarlaıdy QazAqparat tilshisi.

Jábirlenýshi altyn satýmen aınalysqan. 3 aı boıy turaqty tutynýshy bolyp kelgen beıtanys adam sońǵy ret qaryzǵa alǵan altyndardyń aqshasyn bermeı ketken. Jalpy jábirlenýshige keltirilgen shyǵyn kólemi 49 mıllıon teńgeni quraıdy.

Jan-jaqty izdestirý jumystary nátıjesinde kúdikti qamaýǵa alyndy. Tergeý barysynda belgili bolǵandaı, ol jábirlenýshiden alǵan altyn buıymdardy Jetisaı aýdanyndaǵy lombardtardyń birine ótkizip jibergen. Al aqshasyn óz qajettiligine jumsaǵan. Qazirgi tańda asa iri mólsherdegi altyn buıymdar aıǵaqty zat retinde alynyp, zańdy ıesine qaıtaryldy.