«Alataý Jaryq Kompanııasyna» aıyppul salyndy

ALMATY. QazAqparat - «Alataý Jaryq Kompanııasy» AQ-na 4,6 mln teńge aıyppul salyndy, dep habarlaıdy QazAqparat tilshisi Tabıǵı monopolııalardy retteý komıtetine silteme jasap.

Komıtetke qarasty Almaty qalasy boıynsha departamentiniń málimetinshe, «Gorsvetgroup» JShS-nyń ótinishi boıynsha «Alataý Jaryq Kompanııasy» AQ-na qatysty jospardan tys tekserý júrgizilgen.

Tekseris nátıjesi boıynsha «Tabıǵı monopolııalar týraly» Zańnyń 26-baby 2-tarmaǵy 8 tarmaqshasy buzylǵany anyqtaldy.

Atap aıtqanda, «Alataý Jaryq Kompanııasy» úlgilik sharttarǵa sáıkes rettelip kórsetiletin qyzmetterdiń árbir túri úshin tutynýshylarmen jeke sharttar jasaspaǵan.

Osyǵan baılanysty, TMRBD-nyń qaýlysymen «Alataý Jaryq Kompanııasy» AQ-na «Ákimshilik quqyq buzýshylyq týraly» kodekstiń 164-baby 4-bóligi boıynsha ákimshilik jaýapkershilikke tartyp, 4 mln 667 myń 200 teńgege aıyppul saldy.

Aıta keterligi, departament qaýlysyna qatysty Almaty qalasynyń Ákimshilik quqyq buzýshylyqtar boıynsha Mamandandyrylǵan aýdanaralyq sotyna shaǵym túsken, alaıda departament qaýlysy kúshinde qaldy.

Avtory Dýman Arǵyngeldi