Alataý aýdanynyń turǵyndary Saǵyntaevqa alańdatqan suraqtaryn qoıdy

ALMATY. QazAqparat - Búgin Almaty ákimi Baqytjan Saǵyntaev Almaty Art Center-de Alataý aýdanynyń turǵyndarymen kezdesti, dep habarlaıdy QazAqparat tilshisi.

Qala ákimi áleýmettik jáne jol-kólik ınfraqurylymy, medıtsınalyq qyzmetter men quqyq qorǵaý qyzmeti, qoǵamdyq qaýipsizdik, jumys oryndaryn ashý týraly aıtty.

Baqytjan Saǵyntaev barlyq aýdandaǵy sapaly medıtsınalyq qyzmetterdiń mańyzdylyǵyn erekshe atap ótti.

Osy maqsatta medıtsınalyq mekemeleri joq yqshamaýdandarda medıtsınalyq ortalyqtar, ambýlatorııalar ashylatyn bolady.

Onymen qosa, 1 tamyzdan bastap toqsan saıyn jyljymaly medıtsınalyq ortalyqtar jumys isteı bastaıdy. Onda turǵyndar arnaıy mamandardan keńes ala alady. Ákim jumyspen qamtý men jumysqa ornalastyrý máselelerine erekshe kóńil bóldi. Sapaly jumys oryndaryn ashý úshin shara qoldanylýda. Aýdanda «Baqytty otbasy» kópbalaly analardy qoldaý ortalyqtary ashylyp jatyr.

Turǵyndar ınjenerlik jelilerdiń, joldardyń, kósheniń jaryqtandyrý jelileriniń joqtyǵyn alǵa tartty.

Kóbinese olardyń shaǵymy ýchaskelerdi zańdastyrý, úı qurylysy qujatyn retteý, kommýnıkatsııalardy júrgizýge qatysty boldy.

Aýdanda 4760 oqýshy orny tapshy.

3 saǵatqa sozylǵan kezdesýde 400-ge jýyq suraq qoıyldy.

Jazylyp alynǵan suraqtarǵa ákimdik jaqyn arada jazbasha jaýap qaıtaratyn bolady.

«Tez sheshile qoıýy ekitalaı máseleler bar. Ol abattandyrý, jaryqtandyrý máseleleri. Oǵan ýaqyt, qosymsha qarjylandyrý kerek bolady. Qaı jerlerde jaǵdaı múshkil birinshi sol aýdandardyń máselesin sheshýge den qoıamyz», - dedi B.Saǵyntaev.

Ótken senbide ákim Túrksib aýdanynyń turǵyndarymen kezdesken bolatyn.