Alataý aýdanynda jyl sońyna deıin 43 úı paıdalanýǵa beriledi

ALMATY. QazAqparat – Almatyda Alataý aýdanynda jyl sońyna deıin 2724 páterli 43 kópqabatty úı paıdalanýǵa beriledi. Bul týraly búgin qalalyq ákimdikte ótken brıfıng barysynda Alataý aýdanynyń ákimi Shahmerden Ryspaev málimdedi, dep habarlaıdy QazAqparat tilshisi.

Onyń aıtýynsha, jyl basynan beri aýdanda jalpy kólemi 77,8 myń sharshy metr bolatyn 1248 páterli 11 kópqabatty úı berilgen. «Jyl sońyna deıin 2724 páterli 43 kópqabatty úıdi paıdalanýǵa berý josparlanǵan. Onyń jalpy kólemi – 205 myń sharshy metr. Atap aıtsaq, 864 páterli 9 úıden turatyn «Alataý sıtı» turǵyn úı kesheniniń, 1120 páterli 11 úıden turatyn «Almaly» jáne 740 páterli 23 úıden turatyn «Alǵabas» turǵyn kesheniniń qurylysy júrip jatyr», - dedi aýdan basshysy.

Budan ózge, 2016-2018 jyldary aýdanda 43 aýlaǵa kúrdeli jóndeý jumystary júrgizildi. Bıyl 10 aýla kúrdeli jóndeýden ótedi. Keler jyldary 53 aýla jóndeledi.
Bıyl 20 kópqabatty úıdi jóndeý josparlanǵan. Osyǵan oraı, «Turǵyn úı» JShS jáne PIK tóraǵalary, basqarýshy kompanııalar turǵyndarmen kezdesti. Nátıjesinde 32 úıdiń turǵyndary modernızatsııalaý baǵdarlamasyna qatysýǵa nıet bildirdi. Onyń ishinde eki úıdiń jóndeý jumystary aıaqtaldy.