Alashtyń 100 jyldyǵyna arnalǵan telehıkaıanyń saýndtregi shyqty

ASTANA. QazAqparat - «Qazaqstan» ulttyq arnasynyń arnaıy jobasy, Alashtyń 100 jyldyǵyna arnalǵan «Tar zaman» telehıkaıasynyń saýndtregi jaryq kórdi, dep habarlaıdy QazAqparat tilshisi ulttyq arnanyń baspasóz qyzmetine silteme jasap.

«Tar zamandy»  belgili rejısser Murat Bıdosov túsirgen. Onda basty keıipker - Álıhan Bókeıhanov pen ózge de alash zııalylarynyń Alashorda úkimetin qurý jolyndaǵy tartysty ǵumyry sýretteledi. Túsirilim jumystary Almaty oblysynyń Tekeli, Qapal-Arasan taýlarynda, Almaty, Pavlodar jáne Orynbor qalalarynda 2 aı boıy júrgizilgen.

Akterlardyń basym bóligi oblystyq teatrlardan iriktelip alynǵan. Atap aıtqanda, Baltabaı Seıitmamytov, Dýlyǵa Aqmolda, Oljas Abaı, Medǵat Ómirálıev, Kenen Aqúrpekov syndy óner ıeleri Álıhan Bókeıhanov, Mustafa Shoqaı, Ahmet Baıtursynuly, Mirjaqyp Dýlatov, Smaǵul Sádýaqasovtardyń obrazdaryn somdaıdy.

«Tar zaman» telehıkaıasy 12 bólimnen turady. Ol qańtar aıynda «Qazaqstan» ulttyq arnasynan kórsetile bastaıdy. Hıkaıanyń yqshamdalǵan nusqasyn kórermender jeltoqsan aıynda barlyq kınoteatrlardan kóre alady.