«Alash jolymen» ekspedıtsııasy Jympıtyǵa qaıtyp oraldy

ORAL. QazAqparat - Alashorda úkimetiniń 100 jyldyǵy men kórnekti ult qaıratkeri, tuńǵysh zańgerlerdiń biri, Alashorda úkimeti Batys bólimshesiniń tóraǵasy Jahansha Dosmuhamedovtiń 130 jyldyǵyna arnalǵan «Alash jolymen...» tarıhı-tanymdyq ekspedıtsııasy Semeıge deıin baryp, Syrym aýdany ortalyǵy Jympıtyǵa qaıtyp oraldy, dep habarlaıdy «QazAqparat» tilshisi.

Quramynda tarıhshylar, qoǵamdyq uıymdar ókilderi, jýrnalıst, mektep muǵalimderi men oqýshylar bar ekspedıtsııa segiz kúnniń ishinde Jympıty - Qaratóbe - Oıyl - Aqtóbe - Astana - Semeı - Astana - Aqtóbe - Jympıty baǵytynda kezinde Alashorda qaıratkerleri oryn teýip, qyzmet etken jerlerde bolyp, derekter jınap, kezdesýler ótkizdi.

Top jetekshisi, Syrym Datuly atyndaǵy aýdandyq tarıhı-ólketaný mýzeıiniń dırektory Aınagúl Oıshybaevanyń aıtýynsha, ekspedıtsııa músheleri alǵan áser mol, olja da az emes. Ásirese, Semeı qalasyndaǵy Shyǵys Qazaqstan oblystyq Abaı atyndaǵy ámbebap kitaphana men Astanadaǵy Memleket tarıhy ınstıtýtynda ótken sharalarda talaı qundy pikirler aıtyldy. Búgingi urpaq úshin qasterli oryndardyń qaı-qaısysynda da elim dep ótken erler men ult zııalylarynyń óshpes izderi jarqyrap jatqandaı.

«Alashordanyń Shyǵystaǵy astanasy Semeı bolsa, Batystaǵy tý tikken jeri Jympıty aýyly ekendigi málim. Derekter men sýretter óz aldyna, ózimizben birge kóptegen kitaptar da ala keldik. Sonyń ishinde áli tanystyrylymy bola qoımaǵan, Semeı qalasyndaǵy muraǵat shyǵarǵan «Alashorda úkimetine 100 jyl» degen qundy jınaq bar. Osylardyń bárin tarıhshy-ǵalymdardyń kómegimen saralap, qorytyndylaıtyn bolamyz», dedi «QazAqparat» tilshisine A.Oıshybaeva.