«Alash týy astynda» derekti fılminiń tusaýkeseri Ankarada ótti
Kórsetilimge Qazaqstannyń Túrkııadaǵy Tótenshe jáne Ókiletti Elshisi Abzal Saparbekuly, Túrkııanyń Kitaphanalar jáne basylymdar bas dırektorynyń orynbasary ıAhııa Ózen, tanymal túrkitanýshy, Gazı ýnıversıtetiniń professory Hýlııa Kasapoglý Chengel, ádebıetshi-ǵalym Djemıle Kynadjy, professor Ábdýaqap Qara, Túriksoıdaǵy Qazaqstan ókili Asqar Turǵanbaev, túrik zııalylary, qazaqstandyq stýdentter qatysty.
Fılm kórsetiliminde sóz alǵan Elshi Abzal Saparbekuly jeltoqsan aıynyń qazaq ulty úshin erekshe mańyzy bar ekenin aıta kele, Alash qozǵalysy jóninde túsirilgen eń aýqymdy fılmdi daıyndap, Túrkııada kórsetken Túrkııadaǵy «Kók tý» qazaq mádenıeti qoǵamyna alǵysyn jetkizdi.
«Ult-azattyq kúres jolynda Mirjaqyp Dýlatov «Oıan, qazaq!» dep jar salsa, Elbasy Nursultan Nazarbaev «Rýhanı jańǵyrý», «Uly dalanyń jeti qyry» úndeýleri arqyly «Oıan, túrki álemi!» dep shaqyrady», - dedi Abzal Saparbekuly.
«Alash ulttyq qozǵalysyn bastaǵan zııalylar tek qazaq dalasyn oılap qana qoıǵan joq, olar búkil Ortalyq Azııanyń bolashaǵyn oılady. Táýelsiz memleket qura almasa da, táýelsiz memlekette bolýy qajet barlyq sheshimderdi qabyldady», - dedi Elshi.
Tanymal túrkitanýshy Hýlııa Kasapoglý Chengel bolsa qazaq ult-azattyq kúresi ókilderi men túriktiń ult azattyq kúresin júrgizgen tulǵalar arasynda uqsastyq bar ekenin atap kórsetti.
«Olar - egiz rýhtyń, teń tolǵanystyń tulǵalary. Qazir Alash zııalylaryn búkil túrki elderi áspettep eske alady», - dedi ol.
Derekti fılm Ankara turǵyndary, zııaly qaýym ókilder jáne jas zertteýshilerdiń kóńilinen shyqty.
Eske sala ketsek, «Alash týy astynda» derekti fılminiń tusaýkeseri qarasha aıynyń basynda Astana qalasynda ótken bolatyn. Fılmdi Sh.Aımanov atyndaǵy «Qazaqfılm» AQ men «El» prodıýserlik ortalyǵymen birlesip túsirdi. Derekti týyndy «Oıan, qazaq!», «Jarııalanbaǵan avtonomııa» jáne «Qaterli ótkel» sekildi úsh bólimnen turady.