Alash qozǵalysynyń fotoshejiresi jaryq kórdi

ASTANA. QazAqparat - Alashorda úkimeti men Alash avtonomııasynyń 100 jyldyǵyna oraı, QR Ulttyq akademııalyq kitaphanasynda Bolat Múrsálimniń «Alashorda» fotoalbomynyń tusaýy kesildi, dep habarlaıdy QazAqparat tilshisi.

Fotoalbom Alash qozǵalysynyń qalyptasý, saıası sahnaǵa shyǵý, Alash avtonomııasyn qurý, Keńes dáýirindegi qýǵyn-súrgin kezeńderiniń sýretterin qamtıdy. Onda Á.Bókeıhanov, M.Dýlatov, H.Dosmuhamedov,M.Tynyshpaev, M.Shoqaı jáne ózge de el qaıratkerleriniń jastyq shaqtarynda túsken fotolarynan, NKVD abaqtysynda túsirilgen sońǵy sýretterine deıin jınaqtalǵan.  

Mundaǵy fotomaterıaldar taqyryptyq-hronologııalyq turǵyda «Atqan tań», «Oıan, qazaq!», «Alash avtonomııasy», «Sovettik taǵdyrlar», «Abaqty joly», «Taǵzym» atty taraýlarǵa bólingen. Osylaısha, avtor Alash qozǵalysynyń júrip ótken jolyn sýret tilimen baıandap, ult zııalylarynyń ómirine kezeń-kezeńimen sholý jasaýǵa tyrysqan.



Jınaqty «Samuryq-Qazyna» ulttyq ál-aýqat qorynyń qarjylyq qoldaýymen «El-Shejire» qaıyrymdylyq qory Alashorda úkimeti men Alash avtonomııasynyń 100 jyldyǵyna oraı shyǵarǵan.