Alash qaıratkerlerin bir-birine qarsy qoıýdy toqtatý kerek - Darhan Qydyráli

ASTANA.  QazAqparat - Alash qaıratkerlerin bir-birine qarsy qoıýdy toqtatý kerek. Mundaı pikirdi búgin Sarap Time sarapshylar klýbynyń «Tarıhı sana jáne qoǵamnyń rýhanı qaýipsizdigi» taqyrybyndaǵy otyrysynda Halyqaralyq Túrki akademııasynyń prezıdenti Darhan Qydyráli bildirdi, dep habarlaıdy QazAqparat.

«Bizge 1930 jyldardaǵy materıaldardy sol qalpynda baǵalaýǵa bolmaıdy. Máselen, bir hattardy ala salyp, bular bir-birin satty, bir-biriniń ústinen aryz jazdy dep aıtý sol kezeńdi bilmeýden týǵan nárse. Keıde bir-birin qorǵaý úshin jazdy, aralaryna jansyz otyrǵyzdy. Keıde kúshtep qol qoıdyrdy. Tipti, aldaryna balalaryn ákep qınaý arqyly da qol qoıdyryp aldy. Bul búkil otbasyna túsken qasiret edi. KARLAG, ALJIR-de áıelderiniń de, balalarynyń da qanshalyqty azapqa túskenin bilemiz.  Sondyqtan Alash qaıratkerlerin bir-birine qarsy qoıýdy toqtatý kerek dep oılaımyn»,-  dedi ol.

Onyń aıtýynsha, 1930 jyldarda jarııalanǵan materıaldardy kórý, jarııalaý bir basqa. Al olardy saraptama jasaý, taldaý tarıhshylardyń enshisindegi másele.

«Sondyqtan biz ult bolý jolynda bul kezeńnen taǵylym ala otyryp, rýhanı jańǵyrýda úlken qadam jasaýymyz qajet», - dedi Darhan Qydyráli.