Alash qaıratkerleri Frantsııanyń saıası tájirıbesin zerttegen – Qasym-Jomart Toqaev

<p>Memleket basshysy Qasym-Jomart Toqaev Frantsııa prezıdenti Emmanıýel Makronmen Aqordadaǵy kezdesýinen keıingi birlesken málimdemede ekijaqty mádenı-gýmanıtarlyq baılanystyń qaı baǵyttarda damıtynyn aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Tarıhymyzda eki elge ortaq derekter az emes. Halqymyzdyń birtýar perzenti Abaı frantsýzdyń ataqty aqyny Jan de Lafontenniń mysaldaryn qazaq tilinde aýdarǵan. Alash qaıratkerleriniń kóbi frantsýz tilin jetik meńgerip, frantsýz eliniń joǵary mádenıeti men saıası tájirıbesin zerttegen. Qazaqtyń belgili ánshisi Ámire Parıj sahnasynda án shyrqap, talaıdy tamsandyrǵan. Kúsh atasy Qajymuqan Frantsııanyń astanasynda óner kórsetip, kórermendi tańǵaldyrǵany barshaǵa belgili», - dedi Memleket basshysy.

Sondaı-aq, Prezıdent búgingi kezdesý kezinde bilim jáne ǵylym salasyndaǵy jobalardy qolǵa alýǵa erekshe kóńil bólingenin atap ótti.

«Osy oraıda elimizde frantsýz mektepterin ashýǵa, frantsýz tilin úıretýge, akademııalyq baılanysty arttyrýǵa baǵyttalǵan birqatar kelisimge qol qoıyldy. Biz muny joǵary baǵalaımyz», - dedi Qasym-Jomart Toqaev.

Eske salaıyq, Frantsııa Prezıdenti Emmanıýel Makron resmı saparmen Qazaqstanǵa keldi.

Qasym-Jomart Toqaev Aqordada Frantsııa Prezıdenti Emmanıýel Makrondy qarsy aldy.

Qazaqstan men Frantsııa prezıdentteri shaǵyn quramda kelissóz júrgizdi.

Makron bul sapar ekijaqty seriktestik úshin mańyzdy jylmen tuspa-tus kelip otyrǵanyn aıtty.

Qazaqstan Prezıdenti óz sózinde Frantsııa – Qazaqstannyń Eýropadaǵy óte mańyzdy seriktesi ekenin atap ótti. 

Memleket basshylarynyń kezdesýinen keıingi qos eldiń qarym-qatynasy qaı baǵytta damýy múmkin?

Aıta ketý kerek, Qazaqstan Prezıdenti Qasym-Jomart Toqaevtyń Frantsııaǵa byltyr jasaǵan resmı sapary aıasynda 35 qujatqa qol qoıylǵan bolatyn.