Alash qaıratkeri Muhamedjan Tynyshbaevtyń esimi mektepke berildi
Endi Sarqan aýdanynyń Qarǵaly aýylyndaǵy bilim ordasy qoǵam qaıratkeriniń esimimen atalady, dep habarlaıdy QazAqparat tilshisi.
12 mamyr Muhamedjan Tynyshbaevtyń týǵan kúni. Igi is Alash qozǵalysynyń 100 jyldyǵyna tamasha tartý boldy, deıdi arda tulǵanyń shóberesi Maıgúl Qurmanǵalıeva. Ol bastamanyń júzege asýyna yqpal etken jandarǵa sheksiz rızashylyǵyn bildirdi. Buǵan deıin Qarǵaly dep atalǵan mektepte búginde 281 oqýshy bilim alyp jatyr.
Mamandardyń aıtýynsha, Alash qaıratkeriniń esimin ıelengen mektep oqýshylary bolashaqta "Tynyshpaevtaný" isine atsalyspaq. Olar týrıstik marshrýt jobasyn qolǵa aldy. ıAǵnı Muhamedjan Tynyshbaevtyń tabany tıgen aımaqtardyń syzbasyn jasamaq. Bul ólkedegi tarıhı týrızmdi damytýǵa jol beredi. Al tulǵanyń urpaqtary osynaý bastamanyń barlyǵyna qoldaý kórsetýge daıyn ekendikterin jetkizdi.
Sondaı-aq aýylda tarıhshy, aǵartýshy, qazaqtan shyqqan tuńǵysh temir jol ınjeneri, Alash zııalysynyń týǵan kúnine oraı, voleıboldan oblystyq týrnır uıymdastyryldy. Sharada 22 top baq synady. Olardyń arasynda Alakól, Aqsý aýdandary men Taldyqorǵan qalasynyń komandalary bar. Endi uıymdastyrýshylar bul sharany dástúrge aınaldyrýdy josparlap otyr.