Alash arystarynyń kózderi joq sýretteri beınelengen kıimder satý durys emes – dinı basqarma
Áleýmettik jelide Alash arystarynyń beıneleri salynǵan kıimder týraly jazbalar jarııalandy. Kıimderdegi Mirjaqyp, Shákárim, Maǵjan, Júsipbek sekildi tulǵalarymyzdyń sýretterinde kózderi jasyrylǵan. Aǵabek Qonarbaıuly áleýmettik jelide ult qaıratkerlerin bulaı mansuqtaýǵa bolmaıtynyn jazdy.
«Mundaı kıimder jeke kásipkerlerdiń satý maqsatynda jasap jatqan dúnıeleri bolýy múmkin. Alaıda ult qaıratkerlerin bulaı mansuqtaýǵa bolmaıdy. Qazaqstan musylmandary dinı basqarmasy Alash arystarynyń kózi jasyrylǵan kıimderdi shyǵaryp, satýdyń durys emes ekenin málimdeıdi. Sharıǵatta tiri jannyń kózin salmaı, beınesin ǵana salýǵa bolady degen pátýa joq. Múftııat buǵan qatysty pátýa shyǵarǵan emes. Arystarymyzdy bulaı «dáripteýge» jol berilmeýi tıis. El úshin janyn pıda etken Ahmet, Mirjaqyp, Shákárim, Maǵjan, Júsipbek sekildi qaıratkerlerimizdiń asyl beınelerin qorlaýǵa bolmaıdy. Mundaı áreketter – ult qaımaqtaryna degen qurmetsizdik», - dep jazdy múftııattyń baspasóz hatshysy.
Ol, sondaı-aq qazirgi ýaqytta adamdardyń, janýarlardyń, basqa da tirshilik ıeleriniń sýreti salynǵan kıimder shyǵyp jatqanyn, Islam dini mundaı kıimderdi shyǵarýǵa qarsylyq bildirmeıtinin jazdy.
«Alaıda tiri jannyń sýreti salynǵan kıimmen namaz oqymaǵan abzal. Mundaı kıimmen namaz oqý – mákrýh. Al osy máselege qatysty suhbat bergen QMDB tóraǵa orynbasary, Sharıǵat jáne pátýa bóliminiń meńgerýshisi Sansyzbaı qajy Qurbanulynyń sózin kesip, tek bir jaqty baǵytta pikir taratyp, qoǵamda ekiudaı kózqaras týdyrý durys emes»,- dep habarlady Aǵabek Qonarbaıuly.
Aıta keteıik, bıyl qazaqtyń rýhanı kósemi atanǵan Alash ardaqtysy, Ult ustazy Ahmet Baıtursynulynyń týǵanyna 150 jyl tolyp otyr. Sondaı-aq Memleket basshysy Qasym-Jomart Toqaev Almatyǵa sapary aıasynda Ahmet Baıtursynulyna arnalǵan eskertkishtiń ashylý saltanatyna qatysqan bolatyn.
Foto: facebook.com/Aǵabek Qonarbaıuly