«Alash arystary eldik máselelerdi tilip turyp aıtty, jerine jetkizip jaza bildi»- respýblıkalyq basylymdarǵa sholý

ASTANA. 6 qyrkúıek. QazAqparat - Qazaq aqparat agenttigi respýblıkalyq basylymdarda 6 qyrkúıek, seısenbi kúni shyqqan ózekti materıaldarǵa sholýdy usynady.

***

Ótken senbi, 3 qyrkúıek kúni Tájikstan Respýblıkasynyń astanasy Dýshanbe qalasynda Táýelsiz Meleketter Dostastyǵy Memleket basshylary keńesiniń kezekti otyrysy boldy. Oǵan Elbasy Nursultan Nazarbaev qatysyp, sóz sóıledi. Osy aıtýly jıyn arqaý bolǵan maqala el gazeti «Egemen Qazaqstanda» «Eńserilgen ister bar, eńserilmegen de az emes» degen taqyryppen jarııalandy. Basylymnyń atap ótýinshe, TMD-nyń 20 jyldyǵy qarsańynda ótip otyrǵan bul sammıt osy uıym tarıhyn eske salyp ótýdi qajet etedi. KSRO atty alyp ımperııa bir kúnde jalp etkenimen, ornynda qalǵan TMD op-ońaı quryla salǵan joq. Ol - osy tarıhı kezeńdi ótkerý mańdaıyna buıyrǵan qaıratkerlerdiń saıası erik-jigeri, baısaldylyǵy men kóregendiginiń arqasynda ǵana beıbit jolmen damyp, ımperııanyń oshaǵynda qalǵan qolamtanyń otqa aınalýyna oryn bergen joq.

«Birlik pen tatýlyqty tý etken, el ishindegi keleńsiz jaǵdaılardy kóp bolyp aqyl­dasyp sheshýdi maqsat etetin "Yrys aldy - yntymaq" fo­rýmy Tólebı aýdanynyń baý­raı­yn­daǵy "Taý samaly" demalys orta­ly­ǵynda ótti», - dep jazady «Egemen Qazaqstan» gazeti. Bul joly keleli keńestiń taqyrybyna "Yrys aldy - yntymaq" qoǵamdyq forý­my­nyń jastar saıasatyn júzege asyrýdaǵy mindetteri" tańdalynyp alyndy. Rasynda, osy taqyryp búgingi kún turǵysynan qaraǵanda kúıip turǵan másele. At jalyn endi tartyp mingen bozba­lalardyń qatarynda shimirikpesten kisi óltirý, urlyq, tonaý, zorlyq-zom­bylyq kóbeıip, ózegi alynbaǵan biteý jaraǵa aınalyp barady.

***

Qazaq mektepteriniń kóbeıýi, oqýshylar sanynyń kúrt artýy keıbireýler úshin tabys kózine aınala bastady. Aıtalyq, qazir eshkimmen aqyldaspaı, keńespeı jatyp-aq alaqandaı kitapshalar shyǵaryp, ony ýdaı baǵaǵa satatyndar jetip artylady. Tipti juqalyǵy sonshalyqty, paraqtarynyń arasynan kúnniń sáýlesi kórinetin gazetter paıda boldy. Al jýrnal satatyndar - ár bilim ordasynyń basty bas aýrýy. Ásirese, oqý jyly jaqyndaǵanda dál osy «naýqandy» qalaıda tıimdi paıdalanyp qalýǵa tyrysatyndar kóp. Tez ótetin oqý quraldary arasynda kúndeliktiń jóni bólek. Óıtkeni mektep esigin ashatyn birneshe mıllıon balaǵa sonshama kúndelik qajet. Onyń árqaısysy kemi 200 teńgeden satylǵanda qansha qarajat qaltaǵa túsetinin bilesiz be? Bul týraly «Aıqyn» gazetindegi «Qara kúndeliktegi qasiret nemese memlekettik tildi keleke etken kim» degen maqalada keńinen baıandalǵan.

Memleketi myqty, ekonomıkasy áleýetti, saıası júıesi berik Qazaq eli de ınnovatsııalyq órleý jolyn tańdap otyr. Bul rette Qazaqstan tek zaýyt-kásiporyndarǵa zamanaýı ozyq tehnologııalardy keńinen engizýge ǵana kóńil bólmeı, sondaı-aq ǵylym men tájirıbeni ushtastyrýǵa da den qoıǵan. Osynyń jemisindeı, elimizde qııaldy shynǵa, armandy aqıqatqa aınaldyratyn ǵajaıyp ǵylymı jańalyqtar ómirge joldama alýda. Sonyń birine keshe Nazarbaev Ýnıversıtetindegi tutas halyqaralyq jıyn arnaldy. Innovatsııa salasyndaǵy máseleler jaıly «Aıqyn» gazetindegi «Innovatsııa - básekeniń basty sharty» degen taqyryptaǵy maqalada keńinen baıandalǵan. «Keshe Nazarbaev Ýnıversıtetiniń ınnovatsııa salasynda stýdentterdi oqytýmen qosa, termoıadrolyq sıntez jáne energetıkanyń jańa tehnologııalaryn endirýge kirisetindigi jarııalandy. Endirýdi osy joǵary oqý orny janynan qurylǵan Energetıkalyq zertteýler ortalyǵy iske asyrmaq. Bul ortalyq jahandyq kóshbasshy ǵylymı ortalyqtarmen jáne kompanııalarmen birlese otyryp, zamanaýı jáne qoljetimdi energetıkalyq tehnologııalardy ázirleýmen jáne kommertsııalandyrýmen shuǵyldanatyn bolady», - dep jazady basylym.

***

«Alash aınasy» gazetinde L. N. Gýmılev atyndaǵy Eýrazııa ulttyq ýnıversıtetiniń baspasóz jáne baspa isi kafedrasynyń meńgerýshisi, professor Namazaly Omashulymen aradaǵy suhbat jarııalandy. Basylym tilshisiniń barlyq saýaldaryna tuşymdy jaýap bergen professor: «Menińshe, mánniń bári mamanda, ıaǵnı basshylyqtyń durys baǵyt ustap, jumysty tıimdi uıymdastyrýyna baılanysty»,-deıdi. Suhbattyń tolyq nusqasyn oqyǵyńyz kelse, basylymnyń seısenbilik sanyndaǵy «Alash arystary eldik máselelerdi tilip turyp aıtty, jerine jetkizip jaza bildi» degen taqyrypqa nazar salyńyz.

«Túp-tegimizde tórtkil dúnıeni bılegen dańqty da aıbarly qaǵanat bolǵanymyzdy aıǵaqtaǵan Kúltegin, Bilge qaǵan tas eskertkishteri jatqan Mońǵolııa jerinde tamyrly tarıhymyzdyń ózegin toltyryp, kóne jádigerlerimizdiń qataryn kóbeıtetin taǵy bir kóne túrki qorymy tabyldy» - dep jazady «Alash aınasy» gazeti búgingi sanyndaǵy «Kók túrik pen búgingi qazaqtyń arasyn sabaqtastyryp jatqan tarıhı qorym tabyldy» degen taqyryptaǵy maqalasynda. Basylymnyń atap ótýinshe, eshqandaı talan-tarajǵa túspeı, búginge deıin bar qazynasyn ishinde saqtap kelgen osy qorymdy qazý jumystary kezinde tabylǵan jádigerler men sýretter arǵy babalarymyz qurǵan alyp memleket - Túrik qaǵanatynyń qanshalyq aıbarly ári áleýetti, qýatty bolǵanyn aıqyndaı tússe kerek.

***

«Qazaqstan Lıvııanyń jańa bıligin moıyndady», - dep jazady «Kazahstanskaıa pravda» gazeti. Basylymnyń jazýynsha, keshe QR Syrtqy ister mınıstriniń orynbasary Qaırat Sarybaev Qazaqstandaǵy Lıvııanyń ýaqytsha senimdi ókili Ahmed Ád-Dıbti qabyldady.

Kezdesý barysynda Ahmed Ál-Dıb Syrtqy ister mınıstriniń orynbasaryn Lıvııadaǵy jaǵdaıdyń óris alýymen, Ótpeli ulttyq keńestiń ondaǵy ahýaldy turaqtandyrý boıynsha iske asyryp jatqan sharalary jónindegi aqparattarmen tanystyrdy.

Óz kezeginde Q. Sarybaev Qazaqstan Respýblıkasynyń Ótpeli ulttyq keńesti Lıvııadaǵy is basyndaǵy bılik retinde moıyndaıtynyn málimdedi. Sondaı-aq, ol elimizdiń Islam yntymaqtastyq uıymy syrtqy ister mınıstrleri keńesiniń tóraǵasy retinde osy uıymnyń qolda bar resýrstaryn Lıvııadaǵy ahýaldyń tez arada rettelýine jáne gýmanıtarlyq daǵdarysty eńserýge jumyldyrý úshin daıyn ekendigin atap kórsetti.