«Alanııadaǵy ajal joly» – Túrkııada taǵy bir qazaqstandyq kólik apatynan kóz jumdy

<p>Syrtqy ister mınıstrligi Túrkııanyń Alanııa aımaǵynda taǵy bir qazaqstandyqtyń kólik apatynan kóz jumǵanyn rastady, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Qaıǵyly oqıǵa týraly kóz jumǵan kelinshektiń aǵasy Facebook-te jazǵan bolatyn.

«Juma kúni, 13 qazanda qaryndasymyz Álııa Qulmaǵambetovadan aıyrylyp qaldyq. Jasy 38-de ǵana edi. Búkil ómiri alda, jospary kóp bolatyn. Ony Alanııanyń Kestel aýdanyndaǵy (Túrkııa) D 400 tasjolynda avtomobıl qaǵyp ketti. Polıtsııanyń sózine qaraǵanda, ol joldy belgilengen bólikten, baǵdarshamnyń jasyl túsi janǵan kezde kesip ótken, tergeý júrip jatyr. Kólik tizgininde jas qyz bolǵan. Ony oqıǵanyń anyq-qanyǵyn anyqtaǵansha úıine jiberdi. Osynyń aldynda ǵana Álııajan jol-kólik oqıǵasyna kýá bolǵan edi. Tipti ol týraly chatqa da jazǵan. Sondyqtan biz polıtsııa aıtyp otyrǵan nusqanyń durystyǵyna senimdimiz – joldy erejege saı kesip ótken. Túrki taraby tergeýdi ádil júrgizedi dep úmittenemiz», – dedi marqumnyń aǵasy.

Syrtqy ister mınıstrliginiń resmı ókili Aıbek Smadııarov qaıǵyly qazanyń bolǵanyn rastap, oqıǵanyń mán-jaıyn Baǵdat Qulmaǵambetov tolyq jazǵanyn málim etti.

Jazbada Álııa Qulmaǵabetovanyń ómiri úzilgen tasjoldyń «ajal joly» ekeni aıtylǵan.

«Bir aı buryn ǵana Atyraýdan barǵan otbasynyń Túrkııada kólik apatynan qaza bolǵany týraly aqparat eseńgiretken edi. Jol-kólik oqıǵasy taǵy da osy Alanııadaǵy D-400 tasjolynda boldy. Jergilikti turǵyndar ony ajal joly dep ataıdy. Jol jaǵalaýdy kóktep ótedi. Teńizge jetý úshin joldy kesip ótý qajet. Qaıǵyly oqıǵa týraly túrkııalyq pablıkter jazdy», – dep jazdy Baǵdat Qulmaǵambetov.

Aıtylǵandaı, atalǵan trassada kóbine TMD elderinen kelgender ajal qushady. Sebebi bul memleketterde jaıaý júrginshi jolaǵynda adamdarǵa únemi jol beriledi.

Túrkııaǵa baratyn qazaqstandyqtardy ásirese Alanııa aımaǵynda jol erejesin saqtaý ereksheligin eskerip, saq bolýǵa shaqyrǵan jazba avtory qaıǵyly oqıǵa kezinde qoldaý kórsetip, kómek usynǵan Qazaqstannyń bas konsýldyǵyna, onyń qyzmetkerlerine alǵys bildirdi.

Eske salsaq, Túrkııanyń osy Alanııa aımaǵynda qyrkúıek aıynda Qazaqstan azamatshasy men onyń eki jasar sábıi kóz jumǵan bolatyn. Keıin atalǵan otbasynyń otaǵasy da aýrýhanada qaıtys boldy.