Alaman báıge, kontsert, aıtys – Astanada Respýblıka kúni 100-den astam merekelik shara ótedi
«Bıyl Respýblıka kúni merekesine oraı 100-den astam merekelik shara ótkizýdi josparladyq. Onyń basym bóligi – mádenı-buqaralyq sharalar. Máselen, 25 qazan kúni 8 úlken kontsert ótedi. Teatr sahnalarynda taqyrypqa saı qoıylymdar ótedi. Eń aýqymdy mádenı shara – EKSPO aýmaǵyndaǵy kontserttik baǵdarlama bolmaq. Onda tanymal shyǵarmashylyq ujymdar, ánshiler, ansamblder óner kórsetedi», - dedi D. Babamuratov Qazaqstan halqy Assambleıasynda ótken ǵylymı-praktıkalyq konferentsııada tilshilerge bergen suhbatynda.
Onyń aıtýynsha, 25 qazan kúni elorda ıppodromynda úlken Alaman báıge men at jarysy ótedi.
«Odan bólek, jarys túrindegi 20-dan astam sporttyq sharalar da jsoparda bar. Barlyq bilim berý oshaqtarynda, mektepter men joǵary oqý oryndarynda Respýblıka kúnine arnalǵan dóńgelek ústelder men konferentsııalar ótedi. Munyń bári jas urpaqqa Respýblıka kúniniń mańyzyn túsinýge yqpal etedi», - dedi Dáýren Babamuratov.
Sonymen birge elordalyq mádenıet basqarmasynyń málimetinshe, 25 qazanda Memlekettik akademııalyq fılarmonııada respýblıkalyq aıtys ótedi. «Qazaqstan» ortalyq kontsert zalynda Roza Rymbaevanyń shyǵarmashylyǵyna arnalǵan kontsert ótedi. Beıbitshilik jáne kelisim saraıynda «Máńgilik el daýysy» kontserttik baǵdarlamasy kórsetiledi.