Alakólge týrısterdi tartý boıynsha jol kartasy daıyndaldy

SEMEI. QazAqparat – Abaı oblysynda Alakól kólin damytý boıynsha jol kartasy aıasynda 40-qa jýyq shara júzege asyrylady, dep habarlaıdy QazAqparat.

Týrısterdi tartý jáne qyzmet kórsetý deńgeıin arttyrý úshin kól jaǵalaýyn damytýdyń jol kartasy ázirlenip jatyr.

Oblys ákiminiń birinshi orynbasary Aıdyn Kárimov atap ótkendeı, jol kartasy týrısterge qolaısyzdyq týǵyzatyn ınfraqurylym, ekologııa, demalýshylardyń qaýipsizdigi jáne basqa da máselelerdi kezeń-kezeńimen sheshý boıynsha 40 is-sharany kózdeıdi.

«Úrjar áýejaıynyń jaryq sıgnal berý jabdyǵy, beınebaqylaý, syrtqy jaryqtandyrý júıesin qaıta jańartý aıaqtalýǵa jaqyn. Áýejaı termınalyna rekonstrýktsııa jasaý boıynsha jobalaý-smetalyq qujattama (JSQ) ázirlendi, joba memlekettik saraptamanyń qaraýynda. Búgingi tańda «Almaty-Úrjar-Semeı-Úrjar-Almaty» baǵyttary boıynsha reıster aptasyna eki ret oryndalady», – dedi Aıdyn Kárimov.

Sondaı-aq ákimniń birinshi orynbasary bıylǵy maýsymnan tamyzǵa deıin reısterdiń jıiligi aptasyna 3-4 retke deıin artatynyn atap ótti.

Budan bólek, 15 mamyrdan bastap Astanadan Úrjarǵa tikeleı ushaq qatynaı bastaıdy.

«Órt qaýipsizdigin qamtamasyz etý úshin Qabanbaı aýylynda 2 tehnıkaǵa arnalǵan órt deposyn salýǵa JSQ ázirleý bastaldy. Jobany iske asyrý oblysty damytýdyń 2024 jylǵa arnalǵan Keshendi jospary sheńberinde daıyndaldy. 2027 jylǵa deıin jańa aımaqtardy qosa alǵanda, kóldi jaǵalaýdy nyǵaıtý boıynsha jumystar kezeń – kezeńimen júrgiziletin bolady», - dedi Aıdyn Kárimov.