Alakólge qulaǵan áýe kemesiniń ushýǵa ruqsaty bolmaǵan, ushqyshtyń kýáligi de joq — komıtet

<p>ASTANA. KAZINFORM — Azamattyq avıatsııa komıteti 25 shildede Alakólde bolǵan áýe apatyna qatysty tekserý júrgizdi. Bul áýe kemesi azamattyq áýe kólikteriniń memlekettik tiziminde tirkelmegen, tıisinshe ushýǵa jaramdy degen sertıfıkaty da joq bolyp shyqty. </p>

Eske sala keteıik, 25 shildede Jetisý oblysy Alakól aýdany Aqshı aýyly mańynda Alakól kóline deltaplan qulaǵan bolatyn. Saldarynan eki adam zardap shegip, aýrýhanaǵa jetkizildi. Komıtet sol kezde birden tergeý sharalaryn bastap ketti.

Sonyń nátıjesinde bul áýe kemesiniń azamattyq áýe kemeleriniń memlekettik tiziminde tirkelmegeni, tıisinshe ushýǵa jaramdy degen sertıfıkaty bolmaǵany anyqtaldy. Ushqyshta avıatsııa personalynyń qoldanystaǵy kýáligi de joq. 

«Áýe kemesiniń qulaý sebepterin tergeýmen quqyq qorǵaý organdary aınalysady. Áleýmettik jelilerde áýe kemelerinde, sharda jáne ózge de ushý apparattarynda áýe saparyn jarnamalaý jaǵdaılary jıilep ketti» deıdi komıtetten. 

Áýe kóligin tańdaý kezinde qaýipsizdiktiń negizgi aspektilerin eskerý mańyzdy:

— áýe kemesiniń ıesiniń ýákiletti organdar bergen barlyq qajetti lıtsenzııalary men sertıfıkattary bar ekenine kóz jetkizińiz;
— áýe kemesine tehnıkalyq qyzmet kórsetý qashan júrgizilgenin bilińiz;
— ushqyshtyń tájirıbesi men biliktiligi týraly surańyz. Onyń áýe kemesiniń belgili bir túrin basqarý úshin jetkilikti tájirıbesi bolýy qajet;
— áýe kemesiniń ıesi óziniń azamattyq-quqyqtyq jaýapkershiligin, sonyń ishinde jolaýshylar aldyndaǵy jaýapkershiligin saqtandyrǵanyna kóz jetkizińiz;
— ushý aldynda qaýipsizdik boıynsha nusqama men kórsetilim ótkizilýi tıis. Bul sizge tótenshe jaǵdaıda qalaı áreket etý kerektigin bilýge kómektesedi;
— barlyq apattyq-qutqarý jabdyqtary (mysaly, qutqarý keýdesheleri) jaramdy kúıde ekendigine kóz jetkizińiz;
— ushý aldynda aýa-raıynyń ushý úshin qaýipsiz ekenine kóz jetkizińiz. Qolaısyz aýa raıynda ushýdan aýlaq bolyńyz.

«Ushý qaýipsizdigine kúmánińiz bolsa, aqparat alý úshin Azamattyq avıatsııa komıtetine jáne «Qazaqstannyń avıatsııalyq ákimshiligi» AQ-ǵa habarlasyńyz», - deıdi mamandar.