Alakóldiń jaǵasynan kún saıyn 10 tonna qoqys shyǵarylady

SEMEI. QazAqparat - Kommýnaldyq qyzmet mamandary kól jaǵasyn tańǵy saǵat 05:00-den keshki 22:00-ge deıin tazalaıdy. Jaǵalaýdyń uzyndyǵy – 3,8 shaqyrym, dep habarlaıdy QazAqparat.

Jazǵy týrıstik maýsymda kól jaǵalaýynda sanıtarlyq tazartý jumystarymen Úrjar aýdany ákimdiginiń «Maqanshy» kommýnaldyq memlekettik kásiporny aınalysady. 30-ǵa jýyq jumysshy jaǵalaý men arbatty kúnine 3 ret, trotýarlar, avtomobıl joldarynyń jıekterin 1 ret qoqystan, turmystyq qaldyqtardan tazartady.

Sonymen qatar jaǵalaýdaǵy sanıtarlyq tazalyqty saqtaý maqsatymen jańadan qosymsha 200 dana qoqys jáshigi alyndy. Budan bólek, jaǵalaý men arbatqa taǵy 40 qoqys jáshigi qoıylǵan. Kól jaǵasynan kúnine shamamen 10 tonnaǵa jýyq turmystyq qatty qaldyqtar shyǵarylady.

«Abaı oblysynyń eń tanymal týrıstik orny Alakóldiń jaǵasynda kúnine 15-20 myń adam demalady. Byltyr bir maýsymda shıpaly sýǵa túsken týrıster sany 1 mıllıonnan asqan. Al bıyl elimiz ben alys-jaqyn shetelderden keletin demalýshylardyń sany byltyrǵy kórsetkishten de asady degen boljam bar», - dep jazdy Abaı oblysy ákimdiginen.