Alakóldegi órt: Úılerdiń tyǵyz salynýy ottyń tez taraýyna yqpal etken

NUR-SULTAN. QazAqparat – QR Tótenshe jaǵdaılar mınıstrligi órtke qarsy qyzmet komıteti tóraǵasynyń orynbasary Dmıtrıı Tıtov Alakól jaǵalaýyndaǵy aýqymdy órttiń mán-jaıyn aıtty, dep habarlaıdy QazAqparat tilshisi.

Onyń aıtýynsha, órt jalyny 3 myń sharshy metrdi sharpyǵan, 4 demalys bazasyndaǵy qurylystar janyp ketken. Órttiń tez taralýyna yqpal etken negizgi faktorlardyń biri – jel men qurǵaq aýa raıy syndy tabıǵı qubylystar bolǵan.

«Ekinshi faktor – úılerdiń tyǵyz salynýy jáne qurylys materıaly. Bul úıler aǵashtan jasalǵandyqtan órttiń tez taraýyna yqpal etti. Alǵashqy órt sóndirý bólimsheleri 2 mınýtta jetkenin aıtqym keledi. Keıin jaqyn jerdegi órt sóndirý bólimshelerinen qosymsha kúshter men quraldar jetkizildi, tipti jergilikti atqarýshy organdar da jumyldyryldy», - dedi D. Tıtov Ortalyq kommýnıkatsııalar qyzmetinde ótken baspasóz máslıhatynda.

Qazirgi ýaqytta polıtsııa qyzmetkerleri Alakóldegi órt boıynsha qylmystyq is qozǵaǵan. Barlyq qajetti tergeý sharalary júrip jatyr, órt sóndirý zerthanasy da iske qosyldy. Órtke kináli adam anyqtalsa, oǵan materıaldyq zalaldy qalpyna keltirý mindeti júkteledi.

«Resmı túrde zardap shekkender tirkelgen joq. Birneshe adam jaqyn mańdaǵy medıtsınalyq mekemelerge habarlasqan, biraq olar zardap shekpegen, shok jaǵdaıynda bolǵan. Esh adamdy kúıik shalǵan joq», - dedi spıker.

Eske sala ketsek, 4 shilde kúni Alakólde 4 demalys ornyndaǵy 17 ǵımarat tolyǵymen janyp ketken edi.

Qazirgi ýaqytta Alakóldegi alapat órtke qatysty sotqa deıingi tergeý amaldary bastaldy.