Alakólde jyl saıyn mýzykalyq festıval ótkizý josparlanýda

ÓSKEMEN. QazAqparat – Shyǵys Qazaqstan oblysyndaǵy Alakól demalys ornynda jyl saıyn mýzykalyq festıval ótkizý josparlanyp otyr. Bul týraly Shyǵys Qazaqstan oblysynyń týrızm salasyn damytý máselelerine arnalǵan keńeste aımaq basshysy Danıal Ahmetov málim etti, dep habarlaıdy QazAqparat tilshisi.

Aımaq bıligi Alakóldegi demalysty órkenıetti etýge nıetti, sondyqtan eski ınfraqurylymǵa ózgerister engizýdi josparlap otyr. Atap aıtqanda, tamaqtaný oryndaryn ornalastyrý shemasy qaıta qaraldy.

«Jaǵalaýda 347 kásipkerlik nysan demalýshylarǵa qyzmet kórsetedi. Sonymen qatar, Alakóldegi arbatta demalýshylarǵa kedergi bolmaýy úshin tamaqtanatyn jáne káýap daıyndaıtyn oryndarǵa arnaıy jerler berildi. Demalys órkenıentti deńgeıde bolýy tıis. Alakóldegi týrızm deńgeıin kóterip, demalýshylar erekshe áser alý úshin bıyl «ALAZONE ARENA» iske qosylmaq. Bul jer Baký qalasyndaǵy «Jary» sııaqty halyqaralyq festıval ótkizetin alańǵa aınalady», - dedi oblys ákimi.

Sondaı-aq ákim kólge irgeles aýmaqta elektr jelileri men sý qubyry tartylyp jatqanyn, demalýshylardyń qaýipsizdigine jaýapty qyzmetter úshin ákimshilik ǵımaraty salynyp jatqanyn aıtty. Qazir onda sý túbin tazartý jumystary júrgizilip, qutqarýshylar men polıtsııa kezekshilik etýde.

Aıta keteıik, Alakóldegi 163 qonaq úı men demalys bazalarynyń 94-i «ASHYQ» júıesine qosylǵan. 900 qyzmetkerdiń 80% koronavırýsqa qarsy ekpe saldyrdy.