Alakólde kópbalaly otbasylar baspanaly boldy

ALAKÓL. QazAqparat - QR Konstıtýtsııa kúni qarsańynda Almaty oblysynyń Alakól aýdanynda kópbalaly 6 otbasy baspanaly boldy. Turǵyn úı memlekettik «Baqytty otbasy» baǵdarlamasy aıasynda tabystaldy, dep habarlaıdy QazAqparat tilshisi.

Jańa shańyraqqa kirip, qonys toıyn toılaǵandar arasynda «Altyn» jáne «Kúmis» alqa ıegerleri bar. Úsharal qalasynda salynǵan jańa árbir úıdiń aýdany 72 sharshy metr. Árqaısysyna respýblıkalyq bıýdjetten 10 mln teńge qarajat jumsalǵan.

«Páter jaldap, kóship-qonyp júretin kúnder artta qaldy. «Baqytty otbasy» baǵdarlamasy aıasynda kópten kútken úıimizge qol jetkizdik. Endi osy jer balalar mekenine aınalady dep oılaımyn. Eń aldymen Prezıdentimizge, odan keıin oblys, aýdan basshylyǵyna alǵysym sheksiz», - dep qýanyshyn jetkizdi 6 balanyń anasy Irına Eskova.

Jalpy Alakól aýdanynda búgingi kúni turǵyn úı qurylys jumystary josparly túrde júrgizilýde. Atap ótsek, «Nurly jer» memlekettik baǵdarlamasy aıasynda 2017 jyly 20 páter, 2018 jyly 60 páterli turǵyn úı kiltteri kezekte turǵan azamattarǵa berilse, aldaǵy ýaqytta eki 20 jáne bir 60 páterli turǵyn úıdiń qurylysy bastalmaq.