Alakól jaǵalaýyndaǵy ınternet jumysyn jaqsartý qajet – senator
Premer-Mınıstrge joldaǵan saýalynda senator Alakól kóli jaǵalaýynyń ınjenerlik ınfraqurylymyn damytýdyń mańyzdylyǵyna toqtaldy. Qoldanystaǵy elektr jelisine túsetin aýyrtpalyq kóp bolǵandyqtan keı jerlerde elektr qýatynyń jetispeýshiligi baıqalady. Alakólde mobıldi ınternetke qol jetkizýde de problemalar bar.
«Týrıstik obektilerde uıaly baılanys operatorlarynyń stantsııalary bolǵanymen, olardyń qýaty búkil Alakól jaǵalaýyn qamtı almaıdy. Osy oraıda, uıaly baılanys operatorlary stantsııalarynyń aýqymyn arttyrý, týrızm obektileri úshin jeńildikti baǵalarmen joǵary jyldamdyqta ınternet jelilerin júrgizý joldaryn qarastyrý kerek», - dedi óziniń depýtattyq saýalynda Sultan Dúısembınov.
Sonymen birge, senator Almaty oblysyndaǵy taý shańǵysy kýrorttaryn sýmen qamtamasyz etýge baılanysty máselelerdi de kóterdi. Ol qosylatyn nysandar men keleshegi zor taý shańǵysy kýrorttarynyń qajettilikteri úshin sý resýrstaryna gıdrogeologııalyq zertteýler júrgizý qajet ekenin atap ótti.
Depýtattyń aıtýynsha, mundaı jumystar sońǵy ret 1985 jyly júrgizilgen.
Senator Qazaqstanda týrızmdi damytýǵa qatysty ózekti máseleler kelesi jyldyń basynda «Qazaqstannyń ishki týrızmin damytý – ýaqyt talaby» taqyryby boıynsha parlamenttik tyńdaýda qaralatynyn atap ótti.