Alakól mańyndaǵy áýejaı týrıstik maýsymǵa deıin jóndelip bitedi

ÓSKEMEN. QazAqparat – Shyǵys Qazaqstan oblysy Úrjar aýdanyndaǵy áýejaıda rekonstrýktsııa jumystary týrıstik maýsymǵa deıin aıaqtalady. Bul jaıly aımaq basshysy Danıal Ahmetov Úrjar aýdanyna jumys sapary barysynda málim etti, dep habarlaıdy QazAqparat tilshisi.

«Qazirgi ýaqytta áýejaıda qaıta jańartý jumystary qyzý júrip jatyr. Ushý-qoný jolaǵyndaǵy jumystar aıaqtalýǵa jaqyn. Týrıstik maýsymnyń basynda áýejaı kúndizgi ýaqytta demalýshylardy qabyldaýǵa daıyn bolady. Aýdan ákimine úshinshi mamyrǵa deıin áýejaıdyń beınebaqylaý jáne syrtqy jaryqtandyrý júıelerin ornatý jobasyna qosymsha túzetýler engizýdi tapsyrdym», - deıdi oblys ákimi.

Onyń aıtýynsha, kirme joldarda jumystar áli jalǵasýda. Sondaı-aq áýejaıda jańa termınal qurylysyna jobalyq-smetalyq qujattama daıyndalýda.

Eske salaıyq, osyǵan deıin Alakól mańyndaǵy áýejaı jóndeýden ótip jatqanyn habarlaǵan edik.