Alakól aýdanynyń sharýalary alyp qyzylsha ósirdi

<p>Jetisýlyq sharýalar qant qyzylshasyn ósirýge bilek sybana kiriskeli biraz jyl boldy. Qazir barlyq aýdanda tátti túbir egiledi. Bıyl bul qatarǵa alakóldik dıqandar da qosyldy. Búginde Alakól aýdanyndaǵy 20 sharýa qojalyǵy 500 gektarǵa ekken qant qyzylshasyn jınaýǵa kiristi, dep habarlaıdy <a href="Kazinform" target="_blank" rel="noopener">Kazinform.</a></p>

Jetisý oblysyndaǵy qant óndirisin damytýǵa úles qosyp otyrǵan sharýashylyqtyń qatarynda «Súleımenov» sharýa qojalyǵy da bar. Sharýashylyq alǵash ret qyzylsha seýip otyrǵanyna qaramastan, egistiktiń ónimdiligi 500 tsentnerge deıin jetti, al jekelegen tátti túbirdiń salmaǵy 6-8 kılogramǵa deıin baryp otyr. Bıyldyqqa óńir boıynsha salmaǵy jóninen eń alyp qant qyzylshasy da osy qojalyqqa buıyrypty. Jaqynda qazylǵan tátti túbirdiń eń úlkeniniń salmaǵy 8 kg 623 g jetti. 

Foto: Alakól aýdanynyń ákimdigi

Buǵan deıin qyzylsha ósirýdi tıimsiz jáne qıyn jumys dep sanap, tek maıburshaq ósirýmen aınalysqan eken. Degenmen bıyldan bastap qant qyzylshasyna tólem zaýyttan beriletin soma men memlekettik sýbsıdııany qosa alǵanda 40 myń teńgege óskendikten tátti túbir ósirýdiń tabystylyǵy artqan. Soǵan oraı bıyl sharýashylyq qyzylshaǵa den qoıǵan.

- Bıyl Kóksý qant zaýyty amerıkalyq elıtalyq sort tuqymymen qamtamasyz etti. 8 gektardan 320 tonna ónim jınadyq. Alqaptyń birinshi bóliginde bir tátti túbirdiń ortasha salmaǵy 6 kılogramǵa jetse, eń irisi 8 kılogramnan asyp otyr. Ónimderimizdi Aqsý qant zaýytyna óńdeýge tapsyrdyq. Kelesi jyly tátti túbirdiń egis alqabyn ulǵaıtýdy josparlap otyrmyz. Mundaı ónimdilikke qol jetkizý úshin tuqymnyń sorty da, agrotehnıkalyq talaptardy saqtaý da, baptap ósirý men sýǵarý da – bári mańyzdy, - deıdi «Súleımenov» sharýa qojalyǵynyń basshysy Jasulan Súleımenov. 

Foto: Alakól aýdanynyń ákimdigi

Jalpy oblys boıynsha osy jyly 370 myń tonna ónim jınaý josparlanǵan, bul rette 2 qant zaýyty 71 myń tonna qant óndirmek. Alakól aýdany ákimdiginiń málimetinshe, osy kezeńde 52 gektardan 1 250 tonnaǵa jýyq ónim jınaldy. Qazir Úsharal jáne Kólbaı aýyldyq okrýgterinde qyzylsha jınaý naýqany jalǵasyp jatyr.