Alakól aýdanynda úsh aýyl joldyń azabyn tartyp otyr
Bul joldyń 35 shaqyrymyna 2020-2022 jyldar aralyǵynda ortasha jóndeý jumystary júrgizilgen. Bıyl oı-shuńqyry jamalyp, jolaǵyn syzý bastalǵan. Biraq Bıbaqan-Toqjaılaý-Úshbulaq aýyldarynda bul jumystardan tys qalǵan. Qashyqtyǵy 11 shaqyrym bolatyn Bıbaqan men Toqjaýlaılaý eldimekenderiniń ortasyndaǵy joldyń sapasy óte nashar.
«Qabanbaı men Toqjaılaýdyń arasy 45 shaqyrym. Eki ortany bir jarym saǵat júremiz. 10 jyldaı boldy aıta-aıta sharshadyq. Halyq mezi boldy. Aýdan ákimi, oblystan basshylar aýylǵa kelgen saıyn aıtamyz. Nátıje joq» -deıdi aýyl turǵyny Araı Kerimqulov.
Jetisý oblysy boıynsha ekonomıkalyq tergep tekserý departamentine aryzdanǵan Toqjaılaý aýylynyń turǵyndary jolǵa jaýapty merdiger men tapsyrys bergen mekemelerdi tekserýdi surap otyr.
«Joldy jasaıtyndar bizdiń aýyldyń tusyna jetkende bólingen aqsha jetpeı qaldy deıdi. Qarajat bólingennen keıin biraq bólinbeı me? Sanaǵan kezde qalaı sanaıdy? Aýylda aýrýhana da joq. Ortalyqqa jete almaı jolda bosanyp qalǵandarda bar» -dedi aýyl turǵyny Ardaq Arshabaev.
Qazaqparat tilshisi Toqjaılaýlyqtardyń shaǵymyn oblystyq jolaýshylar kóligi jáne avtomobıl joldary basqarmasyna jetkizgen edi.
«Oblystyń jolaýshylar kóligi jáne avtomobıl joldary basqarmasy bul joldy 2025 jylǵy jobalar tizbesine engizigen. Qazirgi ýaqytta 2025 jylǵy bekitilgen oblystyq bıýdjetke bıýdjettik ótinim daıyndalýda. Qurylys-montajdaý jumystaryn 2025 jyldyń II toqsanynda bastaý josparlanýda», - deıdi Jetisý oblysynyń jolaýshylar kóligi jáne avtomobıl joldary basqarmasy basshysynyń orynbasary Aıdos Dosjanov.
Tike tartsa týrısterdi taý ishimen kólge jetkizetin kúre jolǵa kóńil bólinbeı keledi.
Eske sala keteıik buǵan deıin elimizde jol salatyn jáne jóndeıtin merdiger kompanııalardyń reıtıngi ázirlenetinin jazǵanbyz.