«Alakól-2018» kásipodaq jazǵy lageri forýmy ótti
Aǵymdaǵy jyly kásipodaqtar federatsııasy bastaýysh kásipodaq uıymdarymen ózara baılanysqa baǵyttalǵan birqatar iri uıymdastyrýshylyq-tájirıbelik is-sharalar josparlaǵan edi. «Alakól-2018» kásipodaqtardyń jazǵy lageri Federatsııanyń kásipodaq júıesi úshin osy jazdyń basty oqıǵalarynyń biri boldy.
Jazǵy lagerde kásipodaq qozǵalysynyń 100-den astam belsendisi arnaıy oqýdan ótti. Olardyń ishinde jańadan qurylǵan «Senim» densaýlyq saqtaý qyzmetkerleriniń salalyq kásipodaǵynyń, mádenıet, sport jáne aqparat qyzmetkerleriniń salalyq kásipodaǵynyń músheleri boldy.
Forým barysynda saıasattanýshy, saıasat ǵylymdarynyń kandıdaty, QR Kásipodaqtar federatsııasy tóraǵasynyń orynbasary Erlan Saıyrov, «Senim» densaýlyq saqtaý qyzmetkerleriniń salalyq kásipodaq tóraǵasy Saparbek Dúısenov, Shyǵys Qazaqstan oblysy kásipodaqtar ortalyǵynyń tóraǵasy Meıirhan Túleýbaev qatysýshylar aldynda kásipodaqtar qozǵalysynyń ıdeologııasy men qundylyqtaryn ilgeriletýdiń ózekti máseleleri týraly aıtty.
«Bıyl Elbasy áleýmettik salada óziniń birqatar bastamasyn jarııalaǵany belgili. Bul bastamanyń kópshiligi elimizdegi adam kapıtalynyń ındeksin damytýdaǵy negizgi ról atqarady. Búgingi tańda Qazaqstandaǵy eń negizgi másele qaı aımaqta bolmasyn, qaı jerde bolmasyn adam ındeksin damytý. Adam ındeksin damytsaq qana biz damyǵan sonymen birge áleýetti elderdiń qataryna qosyla alamyz», - dedi Erlan Saıyrov. Sonymen qatar, ol adam ındeksin damytý protsesindegi kásipodaqtardyń orny men róline de toqtalyp ótti.
Onyń aıtýynsha, búgingi ózgeristerge toly «Tsıfrlyq tehnologııa» damyp jatqan zamanda kásipodaqtardyń damýy da mańyzdy.
«Sońǵy 25 jyl ishinde elimizde kásipodaqtyń teorııasy men praktıkasy jónindegi pikirtalas, talqylaý bolmaǵan eken. Mine, osyndaı jan jaqty máselelerdi talqylaý úshin qasıetti Alakólde Qazaqstannyń túkpir túkpirinen kásipodaqtyń belsendilerin shaqyrdyq. Bul jerdegi eń negizgi másele kásipodaqtyń yntymaqtastyǵyn arttyrý, ekinshisi kásipodaqtyń ǵylymı sonymen birge teorııalyq deńgeıin kóterý jáne úshinshi elimizdegi rýhanı týrızmdi damytýǵa kúsh salý. Túıinin aıtqanda, Alakól rýhanı týrızmdi damytýdaǵy taǵy bir baǵyt bolmaq», - deıdi QR Kásipodaqtar federatsııasy tóraǵasynyń orynbasary Erlan Saıyrov.
Sondaı aq, semınarda Shyǵys Qazaqstan oblysynyń ákimi orynbasary Ásem Núsipova kásipodaqtar áleýmettik eńbek qatynastaryn sheshýdiń mańyzdy býyny bolyp tabylatyndyǵyn óz sózinde aıtyp ótti.
«Jumysshylardyń ál-aýqaty men áleýeti, olardyń áleýmettik kepili men quqyǵynyń qorǵalýy tek kásipodaqtardyń belsendiligine baılanysty», - dedi Shyǵys Qazaqstan oblysy ákiminiń orynbasary.
Sonymen birge, qoldanbaly ǵylym sektorynyń ókilderi qatysýshylarmen óz tájirıbelerimen bólisip, taqyryptyq trenıngter, tımbıldıng jáne t.b. sharalar uıymdastyryldy.
Aıta keteıik, bıylǵy jyldyń basynan Kásipodaqtar federatsııasy bastaýysh kásipodaq uıymdarymen ózara baılanysqa jáne jumys júrgizýge basa nazar aýdarýda. Sebebi, kásipodaqtar qozǵalysynyń jáne jumys toptarynyń máseleleri men suranystarynyń barlyq spektri bastaýysh kásipodaq uıymdarynda shoǵyrlanǵan.