Alvares GGG-di taǵy aldap ketti me
Kásipqoı boks mamandary ol jospardy qalamaýy da múmkin. Degenmen, olar óz boljamdaryn jasaý arqyly jankúıerlerdi aldaǵy ózgeristerge daıyndap otyrady. Salıqaly saraptama jasaımyz dep, Alvareske qolaıly jaǵdaı jasap jatady, onyń kózdegen maqsatyna jetýine eriksiz járdemdesedi. QazAqparat tilshisi boljam jasaýdan buryn revanshqa qatysty áńgimeniń qalaısha ózgergenin jetkizip kórdi.
Iá, qazirgi kásipqoı bokstyń fılosofııasy túbegeıli ózgerdi. Belbeýden buryn bıznestiń bedeli basym. Ony Golovkın men Alvares arasyndaǵy alǵashqy jekpe-jekke daıyndyq sharalarynan bastap tóreshilerdiń sheshimine deıingi ádilsizdikten anyq baıqaýǵa bolady. "Kanelonyń" birde-bir belbeýi joq. Byltyr Búkilálemdik boks keńesi ony Golovkınge qarsy shyǵýǵa mindettegende WBC ataǵynan óz erkimen bas tartty. Sol úshin talaı ret jankúıerlerdiń synyna ushyrady, GGG-den qashyn júrgen qorqaqtyń deńgeıine tústi. Soǵan qaramastan, Golden Boy alǵashqy jekpe-jekti tolyǵymen ózi uıymdastyrdy. Golovkınniń promoýterin jaqyndatqan da joq. Bylaısha aıtqanda, qazaqstandyq boksshynyń tórt birdeı belbeýi bar bolsa da, barlyǵy Alvarestiń, naqty aıtsaq, onyń resmı ókili Oskar De La Hoııanyń aıtqanymen ótti. Golovkındi ekinshi orynǵa ysyryp qoıǵany sonsha, bir baǵdarlamaǵa kelgende Alvares bannerde ózinen buryn GGG-diń turǵanyn kórip, ony ózgertýdi talap etken. Áıtpese, baǵdarlamaǵa qatyspaımyn dep shyqty. Uıymdastyrýshylar meksıkalyq juldyzdyń talabyn oryndaýǵa májbúr boldy. Golovkın eshteńe aıta almady. Sebebi barlyq sharalarǵa Golden Boy jaýapty.
Golovkın men Alvares arasyndaǵy alǵashqy jekpe-jektiń taǵy bir qısynǵa kelmeıtin tusy - revanshty talap etý quqyǵy. Ondaı múmkindik tek Alvareske ǵana berildi. Al GGG utylǵan jaǵdaıda qarymta jekpe-jekti talap ete almaıdy. Kelisimniń dál osy tarmaǵy qısynǵa da, boks dástúrine de kereǵar. Revanshty talap etý quqyǵy aldymen chempıonǵa beriledi. Bul - kásipqoı bokstyń jazylmaǵan zańy, burynnan kele jatqan dástúri. Óıtkeni chempıondyq dárejege jetý ońaı emes. Al revanshqa qatysty talapty aldymen chempıondarǵa berý - olardyń jetistikterine degen qurmettiń belgisi. Chempıon revansh úshin jas boksshynyń artynan júgirmeıdi. Sondyqtan utylǵan jaǵdaıda qarymta jekpe-jekti talap ete alady.
Golovkın tórt birdeı belbeýdiń ıegeri bolyp sanalady. Meıli, bir tıtýldy Alvarestiń ózi jekpe-jeksiz berse de, qalǵan úsh ataqtyń salmaǵy az emes. Soǵan qaramastan, Golden Boy-dyń jigitteri kásipqoı bokstyń dástúrin de, tarıxyn da ysyryp qoıyp, "Kanelonyń" jaǵdaıyn jasap berdi, talapty oryndaıtyn emes, sol talapty qoıatyn dárejege deıin kóterdi. Al Gennadıı Golovkın bárine shydaýǵa májbúr boldy. Boks dástúrin qatty qurmettese de, Alvarestiń talabyna moıynsundy. Sebebi onyń fan-bazasy myqty, aqyly translıatsııalardy (pay-per-view) satyp alatyn jankúıerleri de kóp. Demek, aqshasy da basym. Oǵan qosa, GGG ýaqytty sozýǵa bolmaıtynyn jaqsy túsinedi. Óziniń jasy 35-te, al meksıkalyq boksshy 27-ge endi keldi. Degenmen, aldaǵy ýaqytta Saýl Alvarestiń komandasy dál osy faktordy barynsha paıdalanýdy kózdep otyr.
Qyrkúıek aıynda bolǵan alǵashqy jekpe-jekten keıin eki jaq ta kópke sozbaı, revanshty ótkizý kerektigin málimdedi. Ýaqytyn da belgiledi. Eki boksshy kelesi jyly mamyrdyń 5-si kúni kezdesedi dep jar saldy. Sebebi ol kúni Meksıkanyń ulttyq kúni toılanady. Atalǵan merekeniń senbige túskeni de jaqsy bolyp tur. Alvarestiń jaǵy qarymta jekpe-jekti talap etkeni sonsha, Golovkınniń aralyq kezdesýlerdi ótkizýine de qarsy boldy. Jaraqat alyp qalsa, mamyrda shyqpaı qala ma dep, ábden alańdady. Biraq bertin kele, Golden Boy-dyń ustanymy túbegeıli ózgerdi. Endi, olar jeltoqsannyń 16-sy kúni bolatyn Davıd Leme men Bıllı Djo Sonderstiń jekpe-jegin kúteıik dep otyr. Atalǵan aıqasta WBO ataǵy sarapqa salynady. Golovkınge absolıýtti chempıon bolý úshin dál sol belbeý jetispeı tur. Golden Boy osyny jaqsy biledi. Sol sebepti Sonderske qarsy óz boksshysyn shyǵaryp otyr. Al Gennadıı Golovkın men Saýl Alvares arasyndaǵy revanshqa qatysty kelissózder ázirshe toqtap qaldy. Oskar De La Hoııanyń aıtýynsha, kelissózder Leme-Sonders jekpe-jeginen keıin jalǵasady.
Golden Boy óz qýlyǵyn ashyq aıtpasa da, sheteldik sarapshylar Alvarestiń josparyn túsingen sııaqty. Boxingnews24.com-nyń sholýshysy Shon Djonstyń oıynsha, Lemeniń arqasynda Golden Boy "Kanelo" men GGG-diń revanshyna qatysty óz talaptaryn kúsheıte alady. "28 jastaǵy Leme - Golden Boy-dyń boksshysy. WBO belbeýin tartyp alsa, ony "Kaneloǵa" qarsy shyǵaryp, mamyrdaǵy Sınko de Maıoda osy eki boksshynyń jekpe-jegin uıymdastyrýǵa bolady. Meksıkalyqtar ondaı jańalyqty qýana qarsy alady. Aqsha da kóp túsedi. Oskar De La Hoııa osyny jaqsy biledi. Asyqpaı otyrǵany da sol. Olar Golovkınge ýltımatým qoıa alady. Qazaqstandyq boksshy meksıkalyq boksshymen kezdesý úshin tıisti talaptardy oryndaıdy. Oǵan kelispese, Alvares mamyrda kanadalyq Davıd Lememen kezdesedi. "Kanelo" WBO belbeýin jeńip alsa, fanattardyń aldynda óz bedelin de kótere alady", - deıdi Shon Djons.
Golden Boy qandaı talap qoıýy múmkin? Árıne, olar eń aldymen revanshty taǵy da Las-Vegasta ótkizýge tyrysady. Golovkınniń komandasy bolsa, ol bastamaǵa qarsy. Alǵashqy jekpe-jektiń tóreshiligi qaıtalana ma degen kúdik bar. Sol sebepti qarymta jekpe-jekti AQSh-tyń Dallas qalasynda, ıa bolmasa, Nıý-Iorkte ótkizgendi qalaıdy. Eki jaq osy ispetti máseleler boıynsha bir kelisimge kelmese, mamyrda Golovkın men Alvarestiń revanshy ótpeýi de ábden múmkin. Sóz joq, "Kanelo" esh utylmaıdy. Sebebi jaqsy gonorarmen birge WBO ataǵyna ıe bolady. Al Lemeniń Golden Boy komandasyna kiretinin eskersek, "Kanelonyń" óz josparyn iske asyra alatynyna kúmán joq.
Davıd Leme WBO belbeýin alyp bere almasa, Bıllı Djo Sonderstiń ózi Alvarespen kezdesýge qarsy emes. "Jel turmasa, shóptiń basy qımyldamaıdy" demekshi, Golden Boy-dyń aldaǵy stsenarııin Sonders te biletin sııaqty. Jaqynda ol Alvareske qarsy shyǵýǵa daıyn ekenin málimdedi. Alaıda "Kanelo" - GGG arasyndaǵy sońǵy jekpe-jektegi tóreshilik qaıtalana ma dep, kúdiktenip otyr. Onyń oıynsha, Golden Boy WBO tıtýlyn «urlap» ketýi ábdin múmkin. «Men ádil tóreshiliktiń bolǵanyn qalaımyn. Amerıkaǵa barýǵa daıynmyn. "Kaneloǵa" WBO belbeýi úshin talasýǵa múmkindik te beremin. Olar oılaıtyn shyǵar, meni sol jaqta op-ońaı tonaı salady. Alaıda ol jekpe-jekti barsha álem kóredi. Jankúıerler ondaı urlyqqa jol bermeıdi», - dedi Sonders.
Golovkın she? Árıne, Gennadıı aralyq jekpe-jekti ótkizýge májbúr bolady. Qazirgi opponentterdiń ishinde Rıota Mýrata, Djermall Charlo men Denıel Djeıkobs bar. Japonııalyq Mýrata WBA tujyrymy boıynsha mindetti úmitker bolsa, amerıkalyq Djermall Charlo - WBC-diń kandıdaty. Al Denıel Djeıkobs revanshqa qol jetkize alady. Alaıda oǵan aldymen Lýıs Arıasty jeńý kerek. WBC basshylyǵy aldymen Golovkın men Alvarestiń revanshyn ótkizý kerektigin málimdedi. Demek, Djermall Charloǵa kútýge týra keledi. Oǵan qosa, GGG-diń bapkeri Abel Sanches Charlo sııaqty boksshylarǵa áli de tájirıbe jınaý qajet dep sanaıdy. Sondyqtan Golovkın japonııalyq Rıota Mýratamen kezdesýi ábden múmkin. GGG-diń komandasy da Japonııada úlken boks keshin uıymdastyrýǵa qarsy emes.
Negizi, Gennadıı Golovkınniń promoýteri Tom Leffler de revanshqa qatysty naqty kelisim bolmasa, basqa jekpe-jekterdi ótkizýge týra keletinin moıyndap otyr. «Revanshty uıymdastyrsaq, jekpe-jek mamyrdyń 5-si kúni ótedi. Ol kúni ótkize almasaq, Gennadııdiń jekpe-jegin naýryzda nemese sáýirde uıymdastyrý boıynsha HBO-men kelissózder júrgizemiz», - dep atap ótti Leffler The Ring jýrnalyna bergen suxbatynda.
Shyny kerek, búginde sarapshylar ǵana emes, kásibı boks maıtalmandary da revanshtyń mamyrda ótetinine senbeıdi. Óıtkeni Alvarestiń menedjmenti taǵy bir tamasha jospardy iske asyrǵaly otyr. Golden Boy alǵashqy jekpe-jekke qatysty xalyqtyń barlyq narazylyǵyn bir sýdıaǵa qalaı bursa, osy joly da revanshqa deıingi ýaqytty sozýdyń amalyn sheber taýyp otyr. Golovkın bir jyldan keıin 36-ǵa keledi. Alvares bolsa, óz daıyndyǵyn ushtap qana qoımaı, revanshqa chempıondyq tıtýlmen shyǵa alady. Áıtpese, alǵashqy jekpe-jekte ol The Ring jýrnalynyń arnaıy belbeýimen shyqqan edi. Onyń ózi rıngke qurqol shyqpaýdyń amaly bolǵan sııaqty.
Osylaısha, Golovkın-Alvares revanshy taǵy bir jylǵa sozylatyn sııaqty. Alvares mamyrda Lememen kezdesemin dep, bir talap qoısa, WBO belbeýin jeńip alǵannan keıin odan beter kúsheıýi bek múmkin. Golovkın bolsa, eshteńe isteı almaıdy. Sebebi revanshty talap etýge quqyǵy joq...