Alpidegi taý shańǵysy kýrorttarynda kóshkinnen 13 adam qaza tapty
Aýstrııa bıligi qar kóshkini qaýpiniń tórtinshi, ekinshi dárejeli deńgeıin engizdi. Tájirıbesi joq shańǵyshylarǵa ashyq shańǵy trassalarynda, al tájirıbeli shańǵyshylarǵa tik betkeılerden aýlaq bolýǵa keńes berildi. Qar kóshkini qaýpi Aýstrııa men Italııanyń soltústiginde ornalasqan tarıhı Tırol aımaǵyna jaýǵan qalyń qar men qatty jelden keıin joǵarylady.
4 aqpan kúni onda 30-dan astam kóshkin tirkeldi. Birneshe adam álige deıin iz-túzsiz joǵalǵandar tiziminde, sebebi aýa raıynyń qolaısyzdyǵynan qutqarý jumystary baıaýlaǵan.
Tıisti eskertýlerge qaramastan, batys Aýstrııadaǵy taý shańǵysy kýrorttarynda mektep demalysyna sáıkes kelgen 13-19 aqpan aralyǵynda adamdar lyq toly bolǵan. Jeksenbide Aýstrııa polıtsııasy bes adam qaza tapqanyn, onyń ishinde 59 jastaǵy er adam qaıtys bolǵanyn habarlady. Ol úıin qardan tazartyp jatqan kezde kóshkin astynda qalǵan. Qutqarýshylar sonymen qatar Sent-Anton-am-Arlbergte shańǵy gıdiniń jáne Tırolda shańǵy teýip júrgen 62 jastaǵy er adamnyń denesin tapty.
Senbide 17 jastaǵy jańa zelandııalyq, 32 jastaǵy Qytaı azamaty jáne 50 jastaǵy Germanııa azamatynyń máıiti tabyldy, olar belgilengen shańǵy trassalarynan tys jerde shańǵy tepken. Senbi kúni tańerteń Shveıtsarııada 56 jastaǵy áıel men 52 jastaǵy er adam Ońtústik-Shyǵys Graýbıýnden kantonynda qar astynda qalyp qoıǵan. Shveıtsarııa polıtsııasy úshinshi adamnyń aman-esen qashyp úlgergenin habarlady. Italııalyq Tırolda senbide Bavarııadan kelgen áıel kóshkinnen mert boldy.
Foto: ZOOM.TIROL