Alık Shpekbaev memqyzmetshilerge syıǵa berilgen aqshamen ne isteý kerektigin aıtty

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev memlekettik qyzmetshilerge berilgen syılyqtardy arnaıy qorǵa ótkizýdiń tártibin túsindirdi, dep habarlaıdy QazAqparat.

Internet-konferensıa barysynda: «Memlekettik qyzmetshini eskertpesten onyń uıaly telefonyna belgisiz bireýdiń atynan tólem tússe, onda bul aqshany arnaıy qorǵa ótkizýdiń tártibi qandaı?», - degen saýal qoıyldy.

Óz kezeginde Alık Shpekbaev qoldanystaǵy normatıvtik-quqyqtyq aktiler memqyzmetshilerge syılyqtardy, materıaldyq ári materıaldyq emes syıaqylardy alýǵa tyıym salatynyn eske salyp ótti.

Bul talap oryndalmaǵan jaǵdaıda, syılyqtyń qunyna qaraı qylmystyq nemese ákimshilik jaýapkershilik eskerilgen. Qylmystyq - 2 AEK-ten joǵary; ákimshilik - 2 AEK-ke deıin.

«Eshbir eskertýsiz memlekettik qyzmetshiniń shotyna túsken aqsha, sondaı-aq tıisti fýnksıalardy oryndaǵany úshin berilgen qarjy anyqtalǵannan keıin, eki aptadan aspaıtyn merzimde respýblıkalyq bıýdjetke aýdarylýy tıis. Osy oraıda atalǵan qarjynyń túsýi jaǵdaıy týraly memlekettik kiristerdiń tıisti organyna túsinikteme usynylýy kerek», - dedi A. Shpekbaev.