Ál-Farabı, Qurmanǵazy men Súıinbaı beınelengen kollektsııalyq monetalar aınalymǵa shyqty

<p>Búgin Qazaqstan ulttyq banki &laquo;Banknotadaǵy portretter&raquo; serııasynan Ál-Farabı, Qurmanǵazy jáne Súıinbaı kollektsııalyq monetalaryn aınalymǵa shyǵardy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Monetalar 8 jeltoqsanda kazcoins.nationalbank.kz ınternet-dúkeninde satyla bastaıdy.

Jańa monetalar 1993 jylǵy úlgidegi Qazaqstan Respýblıkasynyń ulttyq valıýtasy banknotalarynyń birinshi serııasynyń portrettik beınelerine arnalǵan.

Onda kórnekti tarıhı tulǵalar — ǵalym Ál-Farabı, aıtysker aqyn Súıinbaı Aronuly, kúıshi Qurmanǵazy, ǵalym ári etnograf Shoqan Ýálıhanov, aqyn ári fılosof Abaı, sondaı-aq qazaq handary Ábilqaıyr men Abylaı beınelengen.

2011-2013 jyldary Ál-Farabı, Qurmanǵazy jáne Súıinbaı kollektsııalyq altyn monetalary aınalymǵa shyqty.

Kollektsıonerler men halyq tarapynan bolǵan suranysty eskere otyryp, serııa kúmis jáne neızılber qospasynan jasalǵan monetalarmen tolyqtyrylyp otyr.

Foto: Ulttyq bank

Kúmis monetalar árqaısysy 925/1000 synamdy kúmisten, salmaǵy 31,1 gramm, dıametri 38,61 mm, proof daıyndaý sapasymen, nomınaly 500 teńgelik, taralymy 2 000 (eki myń) danada jasaldy. 

Al neızılber monetalar árqaısysy MNTs 15-20 neızılber qospasynan, massasy 11,17 gramm, dıametri 31 mm, uncirculated daıyndaý sapasymen, nomınaly 200 teńgelik, taralymy 50 000 (elý myń) danada jasaldy. 

Kollektsııalyq monetalar Qazaqstan búkil aýmaǵynda belgilengen qunymen tólemniń barlyq túrleri boıynsha qabyldanýǵa, sondaı-aq eldiń barlyq bankinde bank shotyna esepke alynýǵa jáne aýdarýǵa, usaqtalýǵa jáne aıyrbastalýǵa mindetti.

Kollektsııalyq monetalar Qazaqstan teńge saraıynda daıyndaldy.