Ál-Farabı atyndaǵy QazUÝ Saýd Arabııasynyń jetekshi JOO-larymen áriptestikti nyǵaıtýda
Saýd Arabııasy Koroldiginiń astanasy Er-Rııad qalasyna sapary barysynda QazUÝ rektory Ǵalym Mutanov Saýd Arabııasynyń Bilim mınıstri doktor Hamad bın Muhammad Ál ash-Sheıhpen jáne Korol Saýd ýnıversıtetiniń rektory Badran ál-Omarmen kezdesip, eki eldiń ǵylym-bilim salasynda yntymaqtastyq ornatý máselesin talqylady.
Kezdesý barysynda akademık Ǵ.M. Mutanov QazUÝ-dyń jetistikteri men qyzmeti, ǵulama ǵalym Ábý Nasyr ál-Farabıdiń 1150 jyldyǵyna elimizde josparlanyp otyrǵan aýqymdy sharalar týraly aıtyp berdi. Saýd Arabııasy tarapy QazUÝ aýmaǵynda ál-Farabıdiń ǵylymı-tehnologııalyq platformasyn qurý jobasyna, sondaı-aq BUU Órkenıetter alıansymen birge «Ýnıversıtet 4.0» modeli aıasynda iske asyrylatyn «Jibek joly ýnıversıtetteriniń Alıansy» Halyqaralyq IT-klasterin qurýǵa úlken nazar aýdardy. Kezdesýde eki tarap IT, ǵaryshtyq jáne nano tehnologııalar salasyndaǵy birlesken ǵylymı-ınnovatsııalyq jobalardy iske asyrýǵa qyzyǵýshylyq bildirdi.
Qazaqstan Respýblıkasynyń Saýd Arabııasy Koroldigindegi Tótenshe jáne Ókiletti Elshisi Berik Aryn eki el arasyndaǵy dıplomatııalyq qatynastardyń jetistikterin atap ótip, ǵylym men bilim salasyndaǵy yntymaqtastyqty nyǵaıtý qajettiligine nazar aýdardy. Onyń pikirinshe, Saýd Arabııasy ǵylymı-bilim berý salasyndaǵy óziniń zor áleýetin paıdalana otyryp, qazaqstandyq jastarǵa dintaný ǵana emes, sonymen qatar basqa da baǵyttar boıynsha tereń bilim alýǵa múmkindik bere alady.
Saýd Arabııasynyń Bilim mınıstri óz kezeginde el Úkimetiniń ekonomıkalyq jáne qoǵamdyq ómirin modernızatsııalaýǵa baǵyttalǵan «Saýd Arabııasy 2030 strategııalyq baǵdarlamasy» aıasynda bilim berý jáne ǵylym júıesinde júrgizilip jatqan reformalarǵa toqtaldy. Ol Qazaqstanmen ǵylym-bilim salasynda yntymaqtastyq jasaýǵa daıyn ekendigin jetkizip, ál-Farabıdiń 1150 jyldyq mereıtoıyn ótkizýge úles qosatyndyqtaryn atap ótti.
Kezdesý qorytyndysy boıynsha taraptar ǵylymı-bilim berý áriptestigin jáne ekijaqty qarym-qatynastardy nyǵaıtý týraly kelisimge keldi.
Saýd Arabııasynda bilim alǵysy keletin qazaqstandyq jastarǵa SAK tarapynan 163 grant bólindi, onyń basym bóligi qajetti mamandardy magıstratýra jáne doktorantýrada daıyndaýǵa baǵyttalmaq. Sondaı-aq Qazaqstan jastaryn Saýd Arabııasyna oqýǵa qabyldaýdyń talaptary qaıta qaraldy. Jastar Qazaqstannyń Saýd Arabııasyndaǵy Elshiliginiń usynysy negizinde qazaqstandyq jetekshi bilim ordalarymen kelisimnen keıin ǵana joldamaǵa qol jetkize alady.