Ál-Farabı atyndaǵy QazUÝ oqytýshysy óziniń sebepsiz jumystan qýylǵanyn málimdedi

<p>Ál-Farabı atyndaǵy Qazaq Ulttyq ýnıversıteti, jýrnalıstıka fakýltetiniń oqytýshysy Dastan Qastaı ýnıversıtet basshylyǵynyń eshbir sebepsiz jumystan shyǵaryp jibergenine qatysty narazylyǵyn bildirdi, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Bul týraly ol óziniń Facebook – gi paraqshasynda jazdy.

Dastan Qastaı ózin esh sebepsiz jumystan shyǵarǵan jáne ar-namysyna nuqsan keltirgen Ýnıversıtet basshylyǵynyń jazalanýyn jáne QazUÝ-daǵy bilim saıasatynyń ózgertilýin talap etýde.

Joǵary oqý ornynyń oqytýshysy QR Prezıdenti Qasym-Jomart Toqaevqa, QR Ǵylym jáne joǵary bilim mınıstri Saıasat Nurbekke, QR Mádenıet jáne aqparat mınıstri Aıda Balaevaǵa Ashyq hat joldady.

«Men, QR azamaty, ál-Farabı atyndaǵy Qazaq Ulttyq ýnıversıteti, jýrnalıstıka fakýltetiniń oqytýshysy Qastaı Dastan Qýandyquly akademııalyq ádildikti talap etemin! Oqytýshylyq jumysymnyń altynshy aptasy bastalǵanda eshbir «oıǵa qonymdy» sebepsiz ál-Farabı atyndaǵy Qazaq Ulttyq ýnıversıtetindegi jumystan shyǵaryldym. Ýnıversıtet tarapy nelikten mundaı qadamǵa barǵanyna qatysty túsinik berýden bas tartty. Qurmetti Memleket basshysy, mınıstrler, kóz aldymda meniń azamattyq quqym taptalyp, oqytýshylyq bolmysyma, kásibı qyzmetime nuqsan kelip jatyr. QazUÝ basshylyǵyna, ámirshil-ákimshil júıeni «sheberlikpen» júze asyratyn jandarǵa «Táýelsizdik urpaǵynyń» ustanymy, sanasy ashyq azamattyq oqytýshylyq ambıtsııasy unamasa kerek. Menimen aıqas jazýshy-jýrnalıst «Kemel Toqaev aýdıtorııasy» ashylǵannan keıin bastaldy» - dep jazdy Dastan Qastaı.

Dastan Qastaı joldaǵan Ashyq hatqa QR Ǵylym jáne joǵary bilim mınıstri Saıasat Nurbek jaýap qatty.

«Dostar, ál-Farabı atyndaǵy Qazaq ulttyq ýnıversıttiń jas oqytýshysy Dastan Qastaıdyń áleýmettik jelidegi ashyq hatyna baılanysty oqý ordasynyń basshylyǵymen tikeleı baılanystym jáne ustazdardy jumystan shyǵarý nemese qýdalaý faktileri bolmaýy kerektigi boıynsha keńes berdim. Qazirgi ýaqytta Dastan Kastay baýyrymyzdyń jumystan shyǵarylǵany týraly buıryq joq ekendigin jáne jýrnalıstıka fakýltetindegi qyzmetin jalǵastyra beretindigin barshańyzǵa qýanyshpen jetkizemin»,-dep jazdy mınıstr.