Áli de 7 mln jýyq qandasymyz jyraqta júr - Dúnıejúzi qazaqtary qaýymdastyǵy
«Dúnıejúzi qazaqtary qaýymdastyǵynyń qurylǵanyna 32 jyl boldy. Shartarapqa shashylyp ketken qazaqtyń basyn qosaıyq, elimizge ákeleıik degen nıetpen qurylǵan qaýymdastyq. Búgingi kúni zor jetistikterge jetip otyr. Qazirgi kúnniń ózinde mıllıonnan astam qandasymyz keldi, olar ósip-ónip 3-4 mıllıonǵa jetip qaldy. Oralǵan qandastarymyzdyń barlyǵy osy jaqtan bilim aldy, tıisinshe ár salada jemisti eńbek etip jatyr», - dedi Asylbek Baıjumauly.
Onyń aıtýynsha, qoǵamdyq keńeste áli de shet elde júrgen, elge qaıtýǵa nıetti etnıkalyq qazaqtardy qaıtarý boıynsha ózekti máseleler qaralady.
«Shet memleketterdegi qandastarǵa elimizdi nasıhattaý arqyly olardyń kóship kelýine jaǵdaı jasaýymyz kerek. Shekaradan ótý, yhtııarhat, oqý, jumys jáne taǵy da basqa mańyzdy máseleler bar. Osy máselelerdiń sheshimin birlese izdeý úshin qoǵamdyq keńesti qurǵan jaıymyz bar», - dep túsindirdi Asylbek Baıjumauly.
Ol atap ótkendeı, búginde birneshe mıllıon etnıkalyq qazaq shet memleketterde turyp jatyr.
«Boljam boıynsha, shet memleketterde áli de 7 mıllıonǵa jýyq qandasymyz júr. Olar ásirese, Qytaı, Mońǵolııa, Reseı, Eýropa, Iranda shoǵyrlanǵan», - dep derekter keltirdi Asylbek Baıjumauly.