Albert Raý turǵyn úılerdiń bir-birine tym jaqyn salyný problemasyn kóterdi

ASTANA. QazAqparat – Májilis depýtaty Albert Raý ınjenerlik jelilerge júktemeniń artýyna baılanysty kópqabatty úılerdiń bıiktigine shekteý qoıý múmkindigine qatysty pikir bildirdi, dep habarlaıdy QazAqparat tlshisi.

«Bul jaıynda naqty aıta almaımyn. Óıtkeni bekitilgen bas josparǵa sáıkes ınfraqurylymnyń damýy, kópqabatty úılerdiń bıiktigi eskerilgen. Árıne, jer jetkilikti ekeni túsinikti, biraq sonymen birge ekonomıkalyq faktorlar da bar. Qazirgi kezde sý tapshylyǵy men jylý berý júıesiniń tıisti deńgeıde emes ekenin baıqap otyrmyz. Bul jaǵdaı salada qandaı da bir teńgerimsizdik bar ekenin kórsetti. Sondyqtan osy másele zań shyǵarýshylyq sheshimge emes, basqarýshylyq saladaǵy sheshimderge qatysty bolyp tur», - dedi Albert Raý Májilistiń jalpy otyrysynan keıin tilshiler suraǵyna jaýap bere otyryp.

Sondaı-aq ol elorda aýmaǵynda ǵımarattardyń tym tyǵyz salanýy máselesine toqtaldy.

«Árıne, qurylys nysandarynyń bir-birine tym jaqyn salynýyn quptamaımyn. Astanaǵa qatysty aıtsaq, sol jaǵalaýda áleýmettik nysandar salynýy tıis jerde turǵyn úı keshenderi salynyp jatqanyn kórip otyrmyz. Bul óz kezeginde normaǵa saı kelmeıdi, sondaı-aq turǵyn úılerdiń araqashyqtyǵy talaptary saqtalmaǵan. Osynyń saldarynan turǵyndarǵa arnalǵan áleýmettik nysandar, demalatyn saıabaqtar eskerilmegen», - dedi depýtat.