Albert Raý: Qazaqstan árbir daǵdarystan kúshin nyǵaıta otyryp shyǵyp keledi
«Eń aldymen, bizdiń partııanyń 20 jyldyǵymen quttyqtaýǵa ruqsat etińizder. Ásirese, aramyzdaǵy kónekózder partııa qanshalyqty kúrdeli kezeńde qurylǵanyn biletin bolar. 1999 jylǵy Prezıdent saılaýy qıyn jaǵdaıda ótken edi. Kúni keshe Parlamentte bolǵan Prezıdent bul kezeńdi - aılyqty tóleý qıynǵa túsken, zeınetaqyny tóleý múmkin bolmaǵan shaqty eske alǵany belgili. Alaıda bárimiz biraýyzdan Prezıdentti qoldaı otyryp, minekeı 20 jyldyqqa da kelip qaldyq», - dedi Albert Raý Astanada «Memleket basshysy Joldaýynda, Bes áleýmettik bastamada atap ótken tapsyrmalardy iske asyrý aıasynda ekonomıkalyq ósimniń jańa úlgisin qalyptastyrý, halyqtyń kiristerin jáne ómir súrý sapasyn arttyrý» taqyrybynda ótken paneldik sessııada.
Senatordyń aıtýyna qaraǵanda, osy jyldardyń ishinde Prezıdent bergen ýádesiniń bárin de oryndap keledi.
«Eń kúrdeli kezeńde Elbasy «qıyn bolady, biraq birige otyryp, osynyń bárinen attap ótemiz» dep sert bergen edi. Búgingi kúni ótkenge kóz tastaı otyryp, óte kóp eńbektiń jasalǵanyn, eń aldymen Kóshbasshynyń ýádesi jerde qalmaǵanyn kóremiz. Bizdi keıde «aldymen ekonomıka, sodan keıin saıasat» degen qaǵıdat úshin synap jatady. Biraq, ekonomıkalyq ósim barda áleýmettik máselelerdi sheshý ońaıǵa túsetini ras ekenin kelisetin bolarsyzdar. Bizdiń aldaǵy on jyldaǵy maqsat - árbir qazaqstandyqtyń ómir sapasyn arttyrý baǵytynda elimizdi júıeli túrde jańǵyrtý», - dep atap ótti depýtat.
Albert Raýdyń aıtýyna qaraǵanda, partııanyń baǵdarlamasy - eń aldymen Elbasy búkil Qazaqstandy jańǵyrtý baǵytynda usynǵan strategııaǵa ún qosý bolyp tabylady.
«Memleket basshysy osy 20 jyldyń ishinde maqsattarǵa jetý úshin tapsyrmalardyń deńgeıin kótere bildi. Onyń eń qarapaıym mysaly - bizdiń Astana. Bir adamnan basqa eshkim Astananyń keleshegine senbedi. Aqyry, osy arman-maqsat oryndalyp, bizdiń bárimiz búgingi kúni jańa tehnologııalar damyp jatqan EKSPO ǵımaratynda otyrmyz. Mine, arman men maqsattyń oryndalǵany osy», - deıdi senator.
Depýtattyń aıtýynsha, partııa baǵdarlamasynyń taǵy bir maqsaty - jalpy jaılylyq úshin ekonomıkanyń ósimin qamtamasyz etý.
«Osy baǵdarlamany daıyndar aldynda, halyqqa áleýmettik máselelerdi sheshý úshin osyndaı mólsherde aqsha bólinedi dep aıttyq. Osy jyldardyń ishinde maqsatqa keldik. Álbette, qıyndyqtar boldy. 1998-1999 jylǵy daǵdarystan es jııa almaı jatyp, 2008 jyly taǵy kúrdeli kezeńder bastaldy. Biraq, árbir daǵdarystyń bárinen biz óz kúshimizdi nyǵaıta otyryp, shyǵyp kele jatyrmyz. Búgingi ahýaldyń jaıy da ońaı emes. Álemde ne bolyp jatqanyn kórip otyrsyzdar. Bizdiń negizgi ónimderimizdiń baǵasy qubylyp, saýda soǵystary men sanktsııalar júrip jatyr. Bul úrdisterdiń bári de álemdegi tártippen qarama-qaıshy. Osyndaı jaǵdaıda Qazaqstan sekildi jas memleketke óz ornyn taýyp alǵan durys. Sol sebepti, bizdiń basty basymdyq - halyqqa paıdasyn tıgizer turaqty ekonomıkalyq ósim bolýy kerek», - dedi Albert Raý.
Senator óz sózinde Prezıdenttiń makroekonomıkalyq turaqtylyq týraly aıtqanyn eske aldy.
«Sol sebepti, Parlament músheleri retinde naqty ári úılesimdi bıýdjettiń bolǵanyn qalaımyz. Munaı qoryna tek eń kúrdeli jaǵdaıda ǵana júginý kerek», - deıdi Albert Raý.