Aqjaıyq jastary qazaq álipbıiniń jańa nusqasyn talqylady

ORAL. QazAqparat - Elbasymyzdyń «Rýhanı jańǵyrý» baǵdarlamalyq maqalasyn iske asyrý jáne Alash qozǵalysynyń 100 jyldyǵy aıasynda Batys Qazaqstan oblysynyń Syrym aýdany Jympıty aýylynda «Aıbyndy Alash jastary» aımaqtyq jastar forýmy ótti, dep habarlaıdy BQO ákimdiginen.

         Forým jumysyna oblys aýdandarynan jáne elimizge tanymal zııaly qaýym ókilderi, tarıhshy-ǵalymdar, blogerler men belsendi jastar qatysty, olardyń qatarynda, aqyn, Halyqaralyq Shabyt festıvaliniń laýreaty Qalqaman Sarın, ánshi, «Daryn» memlekettik jastar syılyǵynyń laýreaty Ibragım Eskendir de bar.

         Forým plenarlyq otyryspen bastalyp, sektsııalarda óz jumysyn jalǵastyrdy. Sektsııalardyń birinde qazaq álipbıiniń jańa formaty talqylandy. Dál osy jerde jastar ókilderi latyn álipbıiniń jańa nusqasyna qoldaý bildirdi.

         Sondaı-aq, forým qatysýshylary men delegattary «Alash» mýzeıi jumysymen, J.Dosmuhamedov atyndaǵy jalpy bilim beretin mektebimen tanysyp, elimizdiń aýmaǵynda alǵash salynǵan Alash parkinde Alash Orda zııalylaryna arnalǵan eskertkishke taǵzym etip, gúl shoqtaryn qoıdy. Sonymen qatar aýdandyq mádenıet úıi qyzmetkerleri ataýly sharaǵa oraı óńir tarıhynan syr shertetin «Jansha» qoıylymyn qoıdy.

         Forýmnyń arnaıy qonaǵy, aqyn, Halyqaralyq «Shabyt» festıvaliniń laýreaty Qalqaman Sarın: «Elimizdiń tarıhyna taǵzym etý baǵytynda biz babalarymyzǵa áli de qaryzdarmyz. Olardyń táýelsizdik jolynda dinimizdi, tilimizdi, dástúrimizdi, jerimizdi jáne elimizdiń tutastyǵy úshin kúreskeni jolynda bizdiń alatyn sabaǵymyz mol. Alash qaıratkerleri de latyn álipbıin jazý-syzýda qoldandy. Bul bizge tańsyq dúnıe emes. Latyn álipbıi álemde keńinen qoldanylady. Ol jańa tehnologııanyń tili» dep óz pikirin bildirse, óz kezeginde ánshi, memlekettik «Daryn» jastar syılyǵynyń ıegeri Ibragım Eskendir: «Maǵjan sengen jastar eshqashan osal bolmaýy qajet. Bizge berilip otyrǵan múmkindikti paıdalanyp, rýhymyz bıik, armanymyz asqaq bolýy qajet» - dep pikirin ortaǵa saldy.

         Forým «Jas Otan» Jastar qanatynyń Batys Qazaqstan oblystyq fılıalynyń jáne «Syrym jastary» jastar qoǵamdyq birlestiginiń uıymdastyrýymen Batys Qazaqstan oblysy jastar saıasaty máseleleri basqarmasynyń qoldaýymen ótkizildi.